Lana, ahalegina eta konpromisoa arraunkada bakoitzean
Bi traineru seniorrak aurkeztu zituen atzo Hibaikak amabitxi izango duen Maialenen eskutik. Arraun klubaren harrobiak, zein haren bueltan ari diren laguntzaile guztiek leku berezia izan zuten ekitaldi ederrean. Dozenaka Hibaikazale eta adin guztietako herritar bertaratu ziren arraunlariei babesa erakustera.
Hibaika arraun elkarteko senior arraunlariak, eta harrobiko arraunlari gazteak atzoko ekitaldian, Maialen, Xanti eta buruhandien konpartsarekin. Erraldoia izan da Hibaikaren denboraldiko traineruen aurkezpena. Eta erraldoia egin nahi dute denboraldia ere. Bigarren hori gertatzen den jakiteko, uda bukatu arte itxaron beharko da; aurreratu daitekeena da, denboraldia erraldoi egiteko saiakera bizia egingo dutela Hibaikaren bi eskifaiak. Atzo aurkeztu zituen Errennteria-Oreretako arraun elkarteak bi traineruetan ariko diren senior emakume eta gizonak. Bi Madalen traineruak, Maialen amabitxiaren eskutik joango dira, eta hala atzo azaldu ziren plazara arraunlariak, Maialenek lagunduta, eta haiekin batera Xanti, buruhandien konpartsa, eta Udal Txistulari Taldea.
Handia atzoko aurkezpena, eta ederra. Herritar asko-asko gerturatu ziren Zumardira Hibaikakoei babesa erakustera. Udaletxetik abiatu ziren arraunlari seniorrak eta Kapitain Enea kaletik barrena heldu ziren Zumardiraino, erraldoi, buruhandi eta txistulariek lagunduta. Zumardian zain Hibaikazale andana, adin guztietako herritarrak, eta arraunak zut, harrobiko arraunlari gazteek egindako arkutik heldu ziren bertaratutakoen txalo artean.
Arrate Arozenak egin zien bertaratutakoei harrera Hibaikaren izenean, Jon Gozalo kazetariak gidatutako ekitaldian. Azaldu zuen Madalen —hala dute izena Hibaikako seniorren bi traineruek— eta Maialen eskutik doazela, “gure bi traineruek hamarkada luzetan mantendu dute Madalen izena eta une on eta ez hain onetan ere, nortasun bat eman digu”. Herrian sustraitutako elkartea da Hibaika, apala, eta ideia hori ere, lehen lerroan jarri zuten atzoko aurkezpen ekitaldian: “Handikeria ez dugu maite, bai ordea handitasuna: lana, ahalegina eta konpromisoaren handitasuna. jakin badakigulako, kirolaren, eta arraunaren mundu zail honetan, umiltasunarekin batera lehengaiak direla aurreko horiek guztiak”.
Harrobi, zale eta babesleak, ezinbestekoak
Maialeni erreferentzia ondoren, baita Xantiri ere, “haien figuretan herria egiteko modu bat ikusten dugu”. Maialen eta Xanti bezala, Hibaikaren “ikusgarrienak eta ezagunenak” bi traineruak direla ere nabarmen jarri zuen Arozenak bere mintzaldian, aitortza egiteko atzetik datorren harrobi indartsuari, baita elkartearen bueltan lanean ari diren boluntario eta laguntzeei ere, “horiek guztiak gabe, gure bi traineruak ere ez lirateke ezer. Laguntzaile horiek, herria gara, gaur hona aurkezpenera etorri garenak eta beste asko”.
Hitza eman zuten arraunlarien lana eta esfortzuarekin, eta Hibaikaren bueltan diren horien guztiekin aurtengo denboraldia ere “erraldoia” izatea lortuko dutela, “handia bai, baina handikeriarik gabe. Gure modura”.
Horiek bukatuta, banan bana aurkeztu zituzten Hibaikaren senior traineruen bi eskifaiak; Euskotren Ligan ariko dira emakumeak; KAE2 Ligan gizonak. Haiek aurkeztuta, bi ontzien entrenatzaileak ere aurkeztu zituzten. Iñaki Mendizabal da Emakume Seniorren entrenatzailea, eta David Iglesias Gizonen ontzikoa.
“Gogoa eta ilusioa”
Bi horiek ere hartu zuten hitza aurtengo denboraldiko erronkak azaltzeko. Iglesias mintzatu zen lehenik. “Gogo handia eta ilusioa” duen taldea elkartu dela aurten esan zuen Gizon Seniorren entrenatzaileak: “Espero dugu, datozen urteetan maila polita emateko aukera izatea gure gazteak, traineru batekin identifikatzeko aukera izan dezaten, Hibaikara etortzeko gogoa izan dezaten. Poliki-poliki, ahal duguna egingo dugu eta agian denbora apur bat beharko dugu, baina lortuko dugu”.
Mendizabalek itxaropena hitza erabili zuen bere mintzaldian, hala aurreikusten duelako denboraldia emakumeen traineruan, “denboraldia hastear da, eta oso ondo prestatu da taldea. Itxaropentsu gaude beraz gure helburuak lortzeko. Badakigu ez dugula erraza izango baina hortxe izango gara lehian. Eutsi gogor, neskak”.
Zapia eta paparrekoa, ondoren, bi erraldoiei, Hibaikaren izena handiagoa egin dezaten oraindik, eta erraldoiei hainbat arraunlarik eskainitako Agurra.
Ondoren harrobiko arraunlari gazteak plaza erdira atera zituzten, txalo artean horiek ere, “Senior arraunlariak bezain garrantzitsuak dira gure harrobiko gazteak, aurten ere, emaitza oso txukunak lortu dituztenak”. Babesle guzti-guztiei ere eskerrak, eta bukatzeko familia argazkia, ederra eta jendetsua. Gogor eta gogoz dator harrobia.
Hibaikako Emakume eta Gizon Senior arraunlariak
Emakumeen trainerua
- Ane Aiestaran
- Paula Amutxastegi
- Leire Arrojeria
- Eva Lopez
- June Mikeo
- Eva Maria Macia
- Sofia Boscarol
- Paula Corcoles
- Nerea Curto (Patroia)
- Nerea Orena
- Maddi Retegi (Patroia)
- Uxue Rodriguez
- Nerea Deobarro
- June Galardi
- Amaiur Garcia
- Elene Telletxea
- Nora Urbe
- Maddi Iriarte
- Entrenatzailea: Iñaki Mendizabal.
Gizonen trainerua
- Adur Ferradas
- Aitor Legorburu
- Alejandro Fariña
- Ander Plata
- Ander Recondo (Patroia)
- Ander Urtasun
- Anxo Murua
- Edgar Leal
- Eneko Aramendia
- Ibai Vaquero
- Iraitz Lamana
- Javier Erro
- Jon alvarez
- Jordi Triadu
- Jose Antonio Pereira
- Lorenzo agudo
- Oier Gurpegi
- Oier Galalstegi
- Oier Kalegain
- Unax Fernandez
- Entrenatzailea eta arraunlaria: David Iglesias
