"Komunitate txikia irekitzen ari garela" ospatu dute
Maiatzaren 30ean abiatu zuten sanjuandarrek Gora Herria jaialdia. Azken eguna da gaurkoa eta jaialdia borobiltzeko egun osoko festa antolatu dute. Haren baitakoa izan da eguerdiko bazkaria: parrilla argentinarra.
Maiatzaren 30ean abiatu zuten sanjuandarrek Gora Herria jaialdia, eta bi astez Euskal Herriaren eta Argentinaren arteko sareak ehundu dituzte. Egun hauetan guztietan zehar gogoetarako, hausnarketarako eta ondo pasatzeko aukera izan dute, eta gaurkoan guzti horri borobilduko duen egun osoko festa antolatu dute.
Goizean goiz gaztetxoek apar festa egin dute. Ondoren, gazte zein helduek potetxo bat hartu eta dantzan egitera irten dira, eta arratsalderako indarrak hartzeko, Meipiko plazan parrillada argentinarraz gozatu dute. Bazkaltzen hasi aurretik, ordea, Bixi Bixi elkarteko ordezkaria oholtza gainera igo da hitz batzuk esatera.
Argentinarekin lotura berezia duten pertsona asko eta asko gerturatu dira bazkaltzera eta elkartearentzat haien presentzia izatea plazer bat dela adierazi du: “Guretzat plazer bat da gaur hemen jai txiki hau eskaini ahal izatea eta gure kontraesan eta muga guztiekin etorkizun partekatua izango duen komunitate ireki bat eraikitzen ari garela ospatzea”. Aurtengo edizio honetan euskaldunei migratzaile izatea tokatu zitzaien garaiekin konektatzeaz gain, Argentinako herriaren eta bertako jendearen egoera, desirak eta borrokak ezagutu ahal izan dituzte.
Bazkaltzen hasi aurretik, eskerrak eman dizkie “gure lagun argentinar euskaldun guzti guztiei”, baita hitzaldietan, kantaldietan eta antolaketan ibili diren guztiei ere. Segidan bidelagun izan dituzten pertsonak banan banan izendatu ditu: “Hona hemen gure ekipoa, goi mailako jokalariak. Maradonaren kastakoak: Julieta eta Roberto; Argentinatik bertatik Damian, Andoni, Txemis, Joana, La Patxi, Marcial, Ignacio, Hernaniko taldea; bertatik bertara Nati, Betania, Javier; Bartzelonatik Martin, bere testigantzan aurkitu dugun memoriaren indarra; gaurko bazkarian parrillan gidari Marcos, San Lorenzotik egindako fitxaje aparta, Berrian lan egin eta euskaraz bizi dena; eta gure fitxaje fitxajeena Rakel, hitzaldi guztietan kultur aterpea goxoago egin diguna bere pasta argentinarrekin eta enpanadekin; eta etxekoei ere muxu handi bana”. Hitz goxo horien ondoren bazkaltzeari ekin diote.
Arratsaldean festak aurrera egingo du. 17:00etatik aurrera amaiera ekitaldia, eta kantaldi-dantzaldia prestatu dituzte, eta iluntzeko 19:00etatik aurrera Elektrotxorongo Elektrotxaranga eta DJ-arekin amaituko dute jaialdia.
