"Etorkizuneko Antxo irudikatzera" deitu dituzte herritarrak
Luzuriaga eraikinaren eta barrutiaren etorkizunaz aritzeko bi saio "zirraragarri" antolatu ditu herritar talde batek. Hilaren 27 eta 30ean izango dira, Kultur Etxean.
Antxoko Luzuriaga eraikinaren eta oro har barrutiaren etorkizuna elkarrekin diseinatu nahi ditu barrutiko herritar talde batek. Hausnarketarako bi saio antolatu dituzte datozen egunetarako, Kultur Etxean izango dira biak. Datorren ostegunean (hilak 27) egingo dute lehen saioa, herrigintzaz eta parte hartzeaz ariko dira Talaios Kooperatibako kideekin (19:00etatik 21:00etara). Hurrengo igandean (hilak 30), berriz, ondare transmisioaz eta inspirazioaz ariko dira (10:00etatik 12:00etara). Bi saioak «zirraragarriak eta ilusionagarriak» izango direla aurreratu dute antolatzaileek.
«Hiru hamarkadaren ondoren abagune paregabea izango dugu herri berritua izateko, etorkizuneko Antxo irudikatzeko. Luzuriaga berritu bat izango dugu eskura, eta gure herrian nola bizi erabakitzeko aukera baliatu nahi dugu», esan dute antolatzaileek. Horretarako, orain dela 10 urte Luzuriaga Martxan herri plataformak «erakutsitako kemena berreskuratu» nahi dute, «gure herriaren etorkizuna josteko». Luzuriagaren geroa, filosofia, oinarriak eta muina elkarrekin pentsatzera deitu dituzte antxotarrak. “Ezinbestekoa iruditzen zaigu elkarrekin pentsatzen jartzea, nork bere jostorratzarekin puntadarik ederrenak emanda. Joskintza hori ekainean zehar egitea pentsatu dugu”, erantsi dute.
Hilaren 30ean eragile eta herritarren biltzarra ere egingo dutela iragarri dute.
