Lezo-Donibaneko bidegorrian txatar hautsa dagoela salatu dute
Eguzki Talde Ekologistak salatu du txatar deskargek arriskuan jartzen dutela Pasaiako eta Lezoko herritarren osasuna eta ingurumena.
Eguzki Talde Ekologistak salatu du Pasaiako portuan egindako txatarren deskargek arriskuan jartzen dutela herritarren osasuna eta ingurumena. Hain zuzen, prentsa ohar batean adierazi dute pasa den larunbatean Pasaiako portuko kaietan garabi batek txatarra deskargatzen zuen bakoitzean isurtzen zuen oxidozko partikulen hodeiek Lezo eta Pasai Donibane lotzen dituen bidegorritik ibiltzea galarazten zutela, eta horren lekuko zuzenak izan zirela.
Ondorioz, publikoki salatu dute gertakari horiek onartezinak direla, eta pertsonen osasunaren eta ingurumenaren aurkako gertaerak askotan errepikatzen direla: “Urteak daramatzagu egoera hori administrazio publikoen aurrean salatzen eta Pasaiako portuan sortzen diren hauts, zarata eta isurketa kutsagarriak prebenitzeko eta saihesteko neurri eraginkorrak aplikatzeko eskatzen, eta, zoritxarrez, ez dugu erantzun positiborik jasotzen. Enpresen interesak ez du pertsonen osasuna eta ingurumena bermatzearen gainetik egon behar”.
Talde ekologistatik eskatu dute “behin betiko” ingurumenaren eta pertsonen osasunaren aurkako jarduera onartezinak saihesteko protokolo eta neurri eraginkorrak ezartzeko. Horretaz gain, ingurumen eta osasun arloan eskumena duten erakundeek portuko enpresei kontrol gehiago eskatzeko deia egin dute, atmosfera kutsatu ez dadin, gauean zaratarik egon ez dadin eta badian isurketarik egin ez dadin.
