Herri hezitzailea izateko bidean, hasteko, hiru erronka
Herriko eragileek gogoeta prozesua egin dute, Hezkuntza Mahaia eratu eta horrek egin beharreko lanak definitzeko.
Hezkuntza Mahaiko kideak. Oinherri Herrri Hezitzaileen Sareko kide da Lezo. Horren barruan, eta udal gobernuaren Agintaldi Planean jaso bezala, udalerri hezitzaile izateko bidean hainbat batzar egin dituzte herriko hainbat eragilek, Oinherrik gidatutako prozesuan. Horietan herriaren erradiografia egin da, herri hezitzaile baten oinarrizko balioekiko abiapuntua, eta gaurko egoera zien den aztertzeko; diagnosi horren araberako etorkizuneko erronkak ezartzeko; eta erronka horien artetik lehentasun direnak atzeman eta Hezkuntza Mahaia eratu eta lehen bilera definitzeko. Lehentasunen artean hiru definitu dituzte.
Hezkuntza Mahaian lantzeko estreinako lehentasuna herriko haur eta gazteen ongizate emozionalarena izango da; bigarrena euskarazko aisialdia bermatzea; eta hirugarrena harrera plan komunitarioa eta parte hartzailea garatzea. Lezoko Udalak adierazi duenez, erronka horiek bideratzeko hainbat gairen gaineko lanketa egin behar dela ondorioztatu dute herriko eragileek: “Digitalizazioak dakarrenaren inguruko hausnarketa egitea gazteekin; antzerki ariketen bidez gazteen harremanei buruzko gogoeta egitea; etorri berrientzat harrera gida osatzea; Lezon hitz egiten diren hizkuntzen zerrenda egitea; aisialdiko begiraleen formazioa; aisialdi ekintzak koordinatzeko agenda bateratua…”.
Prozesuaren lehen fasea bukatuta, datorren ikasturterako funtzionamendua adostu dute. Gutxienez hiru batzar egingo ditu Hezkuntza Mahaia eratu eta adostutako erronkei eusteko.
Orain arteko bidean honakoak izan dira prozesuan parte hartu duten eragileak: Oinherri, Haurtxo haur-eskola, Txirbilla aisialdi elkartea, Ttakun kultur elkartea, Lezo Herri Eskola, Pasaia-Lezo Lizeoa, Lezo Institutua, Hezikuntza guraso taldea, Errota guraso taldea, kale hezitzaileak, Lezoko Udaleko gizarte zerbitzuetako ordezkariak, eta zinegotziak. “Esker ona adierazi nahi diegu eragile horiei prozesu honetan eta aurrerantzean lankidetzan jarduteko erakutsi duten prestutasunagatik eta borondateagatik”, adierazi du Lezoko Udalak.
Udalak oroitarazi du hezkuntza arloarekin bezala, beste hainbat alorretan eragiteko eraldaketa prozesuak abian daudela, hala nola, haur parkeen gainekoa; zahartzaro aktiboa bultzatzeko BIBE proiektua; edo euskararen plan estrategikoa definitzeko Lezo Euskaragarri prozesua.
