Gozotik hasi, gazitik buka
Hibaikako Gizonek asteburuan hasi dute arraun denboraldia. Astilleron hirugarren sailkatu ziren errenteriarrak, atzo koska bat atzera egin zuten, eta bosgarren sailkatu Pasaiako Badian jokatutako KAE2 Ligako bigarrenean.
Hibaikako Gizonak atzo, KAE2 Ligako bigarren estropadan Pasai Donibanen. Argazkia: Liher Saiz Asteburu betea izan dute KAE eta ETE Ligako arraunlariek. Bi estropada jokatu dituzte larunbat eta igandean Hibaikako gizonek eta larunbatekoak gozotik izan bazuen gehien, gazitik joan zen atzoko estropada. David Iglesias Albizuk entrenatzen duen ontzia ongi aritu zen larunbat arratsaldean Astilleron (Kantabrian), KAE2 Ligako lehen estropadan. Hirugarren sailkatu ziren oso estropada txukuna eginda Astillero (20:54:09) eta Donostiarraren (21:08:09) ondotik, bigarrenetik bi segundora; Hibaikakoek, 21:10:82 denbora egin zuten erlojupekoan.
Atzo baina, koska bat atzera egin zuen errenteriarren ontziak Donibanen jokatutako estropadan. Castreña(22:43:47) izan zen atzo azkarrena eta haren ondotik sailkatu ziren, Donostiarra (22:52:82), Astillero (22:53:19), Busturialdea (23:17:93), Hibaika(23:28:31), Lutxana (24:08:70) eta Santoña (25:45:00).
Sailkapen taulan laugarren da Hibaika 8 punturekin.
Datorren hitzordua , larunbatean Elantxoben. Linean, lau kale, eta lau luze egin beharko dituzte.
Ondoko argazkiak, Liher Saizek eginak dira Pasai Donibaneko estropadan.
