Txubi babesteko, herri proiekzioa
'El conquistador del fin del mundo' telebista saioaren finalean izango da gaur Xuban Moral Otegi lezoarra. 22:30ean hasiko dute pantaila handiko emanaldia.
Xuban Moral Otegi lezoarra. Irudia: El Conquistador / Eitb.eus Gaur (hilak 24, astelehena) da ETB2 kateko El conquistador del fin del mundo saioaren finala eta sasoiko azken emanaldia. Final horretan lezoar bat dago: Xuban Moral Otegi Txubi lezoarra. Hala, lezoar gazteari babesa adierazteko, saioaren zuzeneko herri proiekzioa egingo dute gaur bertan, 22:30ean hasita, Goiko plazan. Emanaldi irekia da, edonor joan daiteke.
Pantaila handia jarriko dute azken emanaldi hori ikusteko, eta ea Txubik garailearen ikurrina bere egiten duten jakiteko. Hala balitz, festa ziurtatua legoke herrian. Bertaratuko direnei etxetik aulkia eramateko eskatu diete. “Etorri eta animatu gure lezoar konkistatzailea”, esan dute antolatzaileek.
Final horretan kontrario latzak izango ditu Txubik. Horien artean daude Andrea Azkune hondarribiarra, Anartz Duoandikoetxea sopelarra, Aritz Zubia eskoriatzarra, Jokin Ramos algortarra, eta Javier Adell Lobo aragoitarra.
