Zaria Koru Eskola eta Txekiako Canto Nachod abesbatzaren emanaldia, asteazkenean
Iztieta auzoko San Jose Langilearen elizan izango da emanaldia, 20:00etan, doan.
Emanaldia antolatu du Zaria Koru Eskolak asteazkenerako Iztieta auzoko San Jose Langilearen elizan 20:00etan. Ez da bakarrik arituko emanaldi horretan, Txekiako Canto Nachad abesbatza izango du lagun. Sarrera doakoa izango da, eta herritar guztiak deitu dituzte bertaratu eta gozatzera musika emanaldiarekin.
15 eta 24 urte bitarteko gazteek osatutako Canto Nachod abesbatzak Txekiako folklorean oinarritutako errepertorioa eskainiko du. Bi abesbatzen arteko lankidetza 2019an hasi zen, eta orduan lortutako arrakastaren ostean, aurten berrartu eta indartu egin dute, “truke horrek eskolako kideen garapen pertsonal eta profesionala ez ezik, herriari eta herritarrei ekarpen kulturala egitea ere bilatzen du”, azaldu dute arduradunek.
Abuztua amaieran eta irailaren hasieran Zaria Koru Eskolako Zariatxo eta Zariagaz taldeetako kantariek bira egingo dute Frantzian eta Txekian zehar. Bira horren barruan, Alsaziako Colmar herrian kontzertua egingo du 2022an Errenteria-Orereta bisitatu zuen Manecanterior abesbatzarekin batera. Pragan, berriz, Radost abesbatzarekin ariko dira.
Biraren bidez, euskal kultura Euskal Herriko mugetatik harago zabaltzea sustatzearekin batera, musikaren bidez nazioarteko loturak indartzea du helburu.
