AHTren kontrako taldeak elkarretaratzera deitu du bihar
Lezo-Errenteriako Renfe tren geltokian egingo dute protesta, bihar osteguna, 19:00etan. Herritarrak parte hartzera deitu dituzte.
AHTren kontrako elkarretaratzea bat Errenteria-Oreretako Herriko Plazan. AHTren lanek aldiriko tren zerbitzurik gabe utziko dituzte Hernani eta Irun arteko herritarrak abuztu osoan zehar. Hala jakinarazi du Espainiako Garraio eta Mugikortasun Iraunkorreko Estatu idazkari Jose Antonio Santanok. Datorren urterako antzeko aurreikuspenak egin ditu, gainera, Santanok.
Horren aurrean elkarretaratzera deitu du bihar, osteguna 27, 19:00etan Oarso-Donostialdeko AHTrik ez taldeak, eta gogor salatu du, 2016an Astigarraga-Irun arteko ohiko trenbidetik AHT igaro ahal izateko lanak hasi zirenetik, asko eta asko izan direla hirugarren haria ezartzeko prozesu horrek eragin dituen kalteak: “ordutegi eta trenen murrizketa, atzerapenak, bertan bera uztea zerbitzuak, matxurak, transbordoak…”.
Horiek guztiek “bidaiari galera” nabarmena eragin dutela dio abiadura handiko trenaren kontrako taldeak, “beste garraio mota batzuetara jotzea ekarri dute. Izan ere, AHTren inposizioa kaltegarria izaten ari da ohiko desplazamenduetarako aldirietako trena erabiltzen duen jendearentzat”. Azken urteetan gainera, okerrera egin duela egoerak diote, “garraio alternatiba gisa jarri dituzten autobusek ez baitituzte trenak eskaintzen dituen zerbitzu guztiak ziurtatzen: Besteak beste, ordutegi guztiak ez dira betetzen, eta ezin dira bizikletak eraman”.
Arlo ekonomikoari ere erreparatu dio AHTren kontrako taldeak gogora ekartzeko, Gipuzkoan bakarrik, 2.000 milioi euro “xahutu” dituztela dagoeneko AHTren plataformaren lanetan. “Hasiera besterik ez da, dirutza horren baitan elektrifikazioa, errailak jartzea, segurtasun sistemak ezartzea, edota Irun eta Donostiako geltoki berrietarako lanak ez baitaude aurreikusita. Bestalde, Astigarraga eta Lezo artean, Martutene, Orereta eta Oiartzundik barrena, 500 milioiko aurrekontua duen trazaketa berri bat eraiki nahi dute”.
Gogor salatu dute halako azpiegiturek “kalteak” baino ez dizkietela ekarriko herritarrei: “Egun ditugun tren zerbitzuen kaltetzea, denonak diren baliabide ekonomiko publikoak gizarte eskarietarako baliatu beharrean—zaintza, osasuna, pentsioak, hezkuntza— enpresa handiei desbideratzea, eta orain zein etorkizunean denoi eragingo digun txikizio ekologikoa”.
Hori horrela, herritar guztiak deitu dituzte biharko elkarretaratzearekin bat egitera.
