Errenteriako X Tenis Opena Ereintza Madalen Saria jokatzen ari dira
Aurtengo txapelketak 29 parte hartzaile izango ditu—azken orduko hiru baja izan dira lesioagatik—.
ATGren Gipuzkoako Tenisaren Zaleak antolatuta Errenteriako IX Tenis Opena Ereintza Maddalen Saria jokatzen ari dira egun hauetan Beraungo erabilera anitzetarako pistan. Hilaren 10ean hasi zen txapelketa eta madalenekin batera jokatuko dituzte finalak.
Aurtengo txapelketak 29 parte hartzaile izango ditu—azken orduko hiru baja izan dira lesioagatik—. Lehiaketa sistema, hurrengoa izango da Ereintzak azaldu duenez: lau tenis jokalariko sei talde, eta bost jokalariko beste bat osatu dituzte. Jokalari bakoitzak talde bereko beste guztien aurka jokatuko du, eta talde bakoitzaren sailkapena lortuko da. Ondoren, zuzeneko kanporaketak jokatuko dituzte lau kategoriatan. Madalenetan jokatuko dituzte finalak —kategoria bakoitzeko bat—.
Txapelketak Gipuzkoako tenis jokalari amateurrik onenak jasoko ditu: Errenteria-Orereta, Donostia, Hondarribia, Tolosa, Legorreta, Bera, eta Lasarte. Patxi Fadrique Lasarteko tenis jokalari gurpildun aulkiaren modalitatean hartuko duela parte nabarmendu dute antolatzaileek.
Parte hartzaileen koadroak, gainera, aurreko urteetako irabazleak eta finalistak ditu. Guztien artean iazko irabazlea nabarmendu behar da, Gaizka Aduriz donostiarra. Azken edizioko finalista ez da ariko lesio bat dela eta.
Doan ikus daitezke partida guztiak. Astegunetan 16:00etatik 21:00etara jokatzen dituzte, larunbatetan 10:15etik 22:00ak arte eta igandetan, 10:15etik 14:00ak arte.
