Lezoko Udala, "harro"
Bihar LGTBI+ Harrotasunaren Eguna da, eta udaleko talde politiko guztiek adierazpen instituzional bateratua zabaldu dute.
Ortzadar bandera. Bihar, hilak 28, LGTBI+ Harrotasunaren Eguna da, eta Lezoko Udaleko talde politiko guztiek adierazpen instituzional bateratua zabaldu dute, “harro” daudela aldarrikatzeko: “Harro gaude gure bizitzez, harro gure genealogiaz eta harro LGBT+ mugimenduaz”.
“Komunikabide nagusienen estigmatizazio saiakera ezberdinek zein manipulazioak, eskuin muturreko diskurtso intoleranteek eta gorroto jarrerek cisheteroarautik kanpo kokatzen diren bizitzak” ezabatu nahi dituztela salatu du udalak; hori dela eta, mugimenduaren ibilbidea gogora ekartzea, ospatzea eta aldarrikatzea “inoiz baino garrantzitsuagoa” dela adierazi dute.
Stonewalletik Euskal Herrira milaka bizipen, galera, aldarrikapen eta lorpen izan direla nabarmendu du udal erakundeak; baina, hala ere, oraindik “egiteko asko” dagoela zehaztu dute: “Eraso LGBT+fobikoen salaketen datuak esponentzialki egin dute gora azken urteetan, LGBT+ pertsonen ikusezintasunak eta bazterketak presente jarraitzen du gure bizitzako arlo guztietan, diskurtso patologizatzaileak ugaritzen ari dira…”. Horren ondorioz, bizitzak “arriskuan” daudela baietsi du udalak.
Egoera horien aurrean, antolatzea eta borrokatzea “ezinbestekoa” dela iritzi du udal erakundeak. Instituzioetatik, besteak beste, honakoengatik apustu egitea “ezinbestekoa” dela adierazi du udalak: politika publiko integral eta sendoak, perspektiba feministan oinarritutako zerbitzuak edota babes kolektiborako eta autodefentsarako mekanismoak ezartzeko bideak. “Anekdotikoak” diren politikak alde batera uzteko momentua dela esan du udalak, “estrukturalak” diren horiek “erdigunean” jartzeko garaia baita. “Horretan ari gara eta hori sustatzen jarraituko dugu, askoren artean eta elkarlanean”, zehaztu dute.
Horregatik guztiagatik, Lezoko Udalak herriko LGBT+ pertsonen gaineko diagnostikoak egin eta horretan oinarritutako ekintza plan integralak abiatzeko konpromisoa hartu du. Prozesu horiek Lezoko LGBT+ mugimenduko kideekin batera abiatuko dituztela jakinarazi dute, eta egon ezean, erreferente eta norbanakoak aktibatzeko moduak sustatuko dituztela aurreratu dute.
Aipatutako guztiaren aurrean, biharko egunaren harira antolatu diren ekitaldi eta mobilizazioetan parte hartzeko deia luzatu du udalak. Bukatzeko, honakoa aldarrikatu dute: “LGBT+ pertsonen bizitzak egunerokotasunean bizigarriak izateko, lan eta borrokatzen ari diren kide eta kolektibo guztiak zoriondu nahi ditugu, harrotzeko moduko mugimendua osatzen dugulako. Gora ekainaren 28a!”.
