Kolore guztiak balkoietan
Udaletxean eta Ibai Ondon ortzadar koloreak gaur. LGTBIQ+ Kolektiboaren Eguna da, Sexu Askapenerako Eguna.
Gaur LGTBIQ+ Kolektiboaren Eguna da, Sexu Askapenerako Eguna. Iruntzen Lezoko Emakume Taldearen ekimenez, udaletxeko eta Ibai Ondoko balkoiak ortzadar koloreekin jantzi dira.
Bilgune Feministaren irakurketan oinarrituta, mezua zabaldu dute Iruntzenekoek gaurko egunari begira: “Indarkeria, eskuin muturraren gorakada eta mugimendu erreakzionarioen azkartzea. Bazterretako gorputzak, erdigunerik ez duten desirak eta mugimendu feministatik kanporatu nahi dituzten kide transak. Esentzialismoa, eskubideen aldeko legeen kontra agertzea eta sistema heteropatriarkal kapitalista arrazista eta koloniala bere horretan mantendu nahia. Hori dena da, besteak beste, disidenteok egunero parean aurkitzen duguna. Baina, aspaldi egin genuen antolatzeko eta bizitza zeharkatzen duen alor oro politizatzeko hautua. Eta horretan gabiltza: sare eta bizimodu bizigarriak sortzen eta sistema zirrikitu posibleetatik arrakalatzen; egiturek sortzen dituzten gorputzak desproduzitzen eta gure identitateetatik amesten dugun hori eraikitzen”.
Aldi berean, gaurko egunari begirako adierazpena egin zuen atzokoan Lezoko Udalak. Hura irakurtzeko baliatu esteka hau.
