Amets batean ez daudela berresteko asteburua
San Juanen bi ontziek Donibane Lohizunen eta Zumaian izango dituzte asteburuko estropadak. Ligen hasierako aldarte onarekin segi nahi dute.
'Erreka' ontzia, joan den igandeko estropadan. Argazkiak: Josu Z. Bi estropadako asteburua izango dute San Juanen bi traineruek. Bihar (larunbata) Donibane Lohizunen lehiatuko dira, eta etzi Zumaian. ETE Ligakoak 12:00etan (bihar, larunbata) eta 11:00etan (etzi) izango dira hurrenez hurren; KAE1ekoak 17:30ean (bihar) eta 12:00etan (etzi). Batez ere gizonen traineruak izan duen hasiera ikusita, amets batean ez daudela berresteko asteburua izango dute San Juanen bi traineruek.
Hankak lurrean. Edo hobe esanda, hankak tostan. Hala bizi nahi dute KAE1eko San Juanen asteburua. Izan ere, joan den asteburuan eurek badian antolatutako banderan erabateko nagusitasuna azaldu zuten Joseba Fernandezek entrenatutakoek; neguko estropadetan, eta txapelketetan azaldutako maila berretsi besterik ez zuten egin arrosek ligako lehenean. Adi, baina. Sasoia luzea da, eta itxuraz dena bide egokitik badoa ere, izango dituzte gainditzeko koska latzak Erreka traineruko kideek. Fernandezen egiteko era zein den jakinda, ziur bai Donibane Lohizunen zein Zumaian umiltasunez, baina sen lehiakorrez ariko direla arraunlariak, amesten duten horri forma ematen jarraitzeko.
Batelerek ere hankak tostan dituzte. Gazte-gazteak dira, traineruen munduan ia hasiberriak. Horregatik, ikasteko urtea dute aurtengoa. Edonola ere, ETE Ligako joan den asteburuko bi estropadetan beheko postuetatik at, eta zerbait gehiagoren bila joateko aukera dutela sumatu dute Anartz Guereñok zuzendutakoek. Agian, helburu potolo bezala ETEko lehen txandari zeharka begira hasi dira; erne, ordea, alboan eskarmentudun traineruak dituztelako, eta zail izango dutelako gora egiteko bidean ikusgarriak izango diren emaitzak lortzea. Baina amesteko eskubidea dute ere Batelerek, eta airean den hori puntu bidez lurrera ekartzeko aukera ona izango dute asteburuan.
Uztailaren 5ean arraun sasoiari buruzko zenbaki berezia publikatuko du OARSO BIDASOKO HITZAk papereko edizioan. Bertan, San Juanen traineruen helburu zehatzak, arraunlarien zerrendak, estropaden egutegia, eta bestelako asko ezagutzeko aukera izanen dute HITZAren harpidedunek.
