Galiziako usain eta doinuz bete da Zumardia
Galiziako Kultura, Folklore eta Gastronomia Astearen XXXIII. ekitaldia egiten ari dira Errenteria-Oreretan Gipuzkoako Galiziako Etxeak antolatuta.
Zumardian den karpan Galiziako gastronomiaz gozatzera bertaratzen ari da herritar andana. Galiziako Kultura, Folklore eta Gastronomia Astearen XXXIII. ekitaldia egiten ari dira Errenteria-Oreretan, Gipuzkoako Galiziako Etxeak antolatuta. Bihar jarriko diote ginga, Triskele gaita taldearen emanaldi eta produktu gastronomikoen dastaketarekin.
Agintariei harrera eginda atzo zabaldu zituzten gastronomia postuak Zumardian. Asteburu osoan zehar dastatu ahalko dira Galiziako produktuak bertan, baita erosi ere. 19:00etan Sarrabete folk musika taldearen emanaldia Niessen aretoan. Sarrerak, 5 euroan daude salgai. Egin klik hemen erosteko.
Manuel Gomez Gipuzkoako Galiziako Etxearen lehendakariordeak balorazio ona egin du astearen gainean, eguraldia lagun ez badute izan batez ere gaur, “ez du laguntzen giroak, baina horren aurrean ezin dugu ezer egin, ez dago gure esku. Hala ere, jende ugari ari da bertaratzen produktuak dastatzera ondu dugun karpan”.
Arratsaldeko hitzorduari erreferentzia egin dio Gomezek, Sarrabete folk musika taldearen emanaldiari, “gastronomia dastatzeko aukera bihar arratsera arte izango da, eta gaur arratsaldean kulturari begira ere jarriko gara Sarrabete taldearen emanaldiarekin”. Bihar, igandea Trisquele Gaita bandak girotuko du astea Zumardian 12:30ean egingo duen kontzertuarekin.
Gastronomiari begirako espazioan jende ugari atzo gauean, eta gaur gauean ere hala espero dute. Eguerdian ere bazebilen jendea bertan. Izan ere, aukera paregabea eta “kalitatezkoa” dutela nabarmen jarri dute parrilatan saiheskia egin eta olagarroak egosten ari zirenak: “Olagarroa galiziar erara, saiheskia, oilaskoa, txorizoa, piperrak, patatak, marisko parrillada, haragi parrillada eta nola ez Ribeiroa eta Albariñoa dastatzeko aukera dago”.
Postua ere Galiziako produktu gastronomikoak erosteko, tartean, gaztak eta ogia.
