Hibaikako gizonentzat punturik ez Elantxoben
Ontzia deskalifikatu egin dute bere kaletik ez sartzeagatik. KAE 2 Ligaren sailkapen orokorrean, bosgarren postuan dira errenteriarrak.
Hibaikako gizonen ontzia gaur Elantxoben. Argazkia: Xabi Asensio Pena. Hibaikaren gizonen ontziak ez du gaur punturik poltsikoratzeko aukerarik izan Elantxoben. Bertan izan dute hitzordua KAE 2 Ligaren hirugarren estropada jokatzeko. Itsasoa zakar oso, baina ez ditu horrek lehiatik kanpo utzi. Epaileek berea ez zen kale batetik sartzeagatik deskalifikatu dute ontzia eta, horrenbestez, gaurko lehiatik kanpo utzi.
Gertakari horrek izan ditu ondorioak sailkapen taulan ere. KAE Ligaren orokorrean, laugarren postutik, bosgarren postura pasa da Errenteria-Oreretako arraun taldea. Aurrera begira dira orain David Iglesiasek entrenatzen dituen arraunlariak, izan ere, hasi baino ez da egin arraun denboraldia, eta aurretik oraindik ere estropada dezente dituzte gaurkoari buelta eman eta helburu duten taularen goiko aldeko postu horietara gerturatzeko.
Hurrengo hitzordua Donostian izango dute larunbatean, uztailak 6, 11:00etan hasita. Estropada horretan izango dute aukera erakustaldia egiteko errenteriakoek. Ilusioa, gogoa eta lana, ziur, ez dute faltako.
