Inudeak eta Artzainak ez dira euriaren beldur
Nesken pala-goma txapelketa atzeratu egin dute eguraldiagatik. Bihar jokatuko dituzte partida horiek, frontoian, 10:30ean hasita.
Inudeak eta Artzainak San Pedroko jaietan. Eguraldi makurrarekin hasi da eguna. Giro ez dela pentsatuko dute asko eta askok, baina Inudeek eta Artzainek ez direla euriaren beldur erakutsi dute San Pedron gaur. 12:00etan zuten aurreikusia haurren desfilea, eta zalantzan izan dira, frontoi estalian egin edota kalera atera euriak ez duelako atsedenik hartu goiz osoan zehar, eta gogotik aritu da. Frontoian antolatuta zegoen nesken paleta-goma txapelketa bertan behera utzi dute eguraldiarengatik, hain justu ere. Bihar goizean, 10:30ean hasita jokatuko dituzte partidak.
Azkenean, euriak atseden eman du tarte batez, eta tarte hori bera da baliatu dutena txikienek euren desfile koloretsua kalera atera, eta musika eta alaitasuna han-hemenka zabaltzeko. Globo, goxoki, eta barkillo saltzaileek ez dute hutsik egin desfilean, ezta pertsonaiek ere, dotore-dotore jantzita.
Arratsalde partean, musika ibiltaria, haur afari herrikoia, afari herrikoia eta Rockalean izango dituzte aukeran sanpedrotarrek. DJ festa ere aukeran, parrandan jarraitzeko.
Gaur, larunbata:
- 18:30: Musika ibiltaria.
- 17:30: Jolasak arraun elkartean.
- 20:30: Haur afari herrikoia.
- 21:00: Afari herrikoia. Postrean, Kantuz saioa egingo dute.
- 23:30: Rockalean. Jarraian, DJ Esam eta DJ Hodi, eta Garimbo.
Bihar, igandea:
- 10:00: Porrusalda txaranga. Zuri-gorriz janzteko deialdia egin dute.
- 12:00: Inudeak eta Artzainak (helduak). Ondoren, Vermutekea egingo dute Boteron.
- 17:00: Jolasak, merienda eta diskofesta haurrentzako frontoian.
- 17:30: Esku pilota finala (bigarren mailakoa).
- 18:30: Esku pilota finala (lehenengo mailakoa). Ondoren, Modestorekin dantzaldia egingo dute.
- 20:00: Bokata txapelketa frontoian.
- 23:00: Zezensuzkoa.
