Indarberrituta itzuliko da Duintasuna urrian
Ikasturteko azken elkarretaratzea egin dute pentsiodunek gaur eguerdian. Urriaren 7an itzuliko dira kalera, pentsio duinak, eta osasun zein zaintza sistema publiko kalitatezkoa aldarrikatzeko.
Duintasunaren elkarretaratzea, gaur. Sasoiko azken elkarretaratze eta manifestazioa egin dute gaur pentsiodunek Errenteria-Oreretan. Eguraldia ez dute lagun izan lehen unetan eta udaletxeko arkupetan egin dute batzarra. Gogor salatu dute Gasteizko gobernu berriaren programak ez diola inongo erreferentziarik egin 1080 euroko gutxieneko pentsioen osagarriari, “nahiz eta pentsiodunen mugimenduak duela sei urte baino gehiagotik eskatua, eta ez da konpromisorik txikiena ere azaltzen”.
Larritzat jo dute egoera, izan ere, gaur gaurkoz Araba, Bizkai eta Gipuzkoan 1.080 euro azpitik pentsioak kobratzen dituzten 165.000 pentsiodun daude, “gehienak, emakumeak”.
Osakidetzaren egoera orokorra ere mintzagai izan dute pentsiodunek gaurko protestan. Zehazki, Deustobarometroari begira jarri dira: “Duela egun batzuk egindako inkestaren arabera azken bederatzi urtetan ondoen baloratutako zerbitzu publikoa izatetik, txarrenen artera igaro da Osakidetza; balorazio ezkor horrek, gainera, okerrera egin du azken bi urteetan. Imanol Pradales lehendakariak zerbitzuaren narriadura bideratzeko neurriak hartuko dituela agindu du. Ikusiko dugu zer geratzen den agindutako horretatik, Osakidetzaren gaineko politikaren errealitatea murrizketak eta adabakiak baino ez direlako”.
Agintean diren berberak direla osasun zerbitzu publikoaren narriaduraren erantzule salatu du Duintasunak eta horren aurrean mobilizazio iniziatiba zabala eta bateratua bultzatzera deitu du osasungintza publikoaren defentsan, osasungintzako sindikatuak, osasun publikoarena aldeko plataformak eta pentsiodunen mugimenduak bat eginda.
Etxera ekarri du gaia, bertakoaren gaineko irakurketa egiteko. Gaur gaurkoz, Beraungo anbulatorioaren zerbitzua %100ean dagoela jakinarazi du Duintasunak, baina Iztietako anbulatorioan egoera oso bestelakoa dela jarri du lehen lerroan, “sei profesional laneko bajarekin daude eta ez dira hutsune horiek bete. Egoerak beraz larria izaten jarraitzen du eta gaia oporretatik bueltan berrartuko dugu berriro”. Osasun sistema publikoa babestu beharrekoa, baita zaintza sistema publikoa ere. Azken horrekin ere kezka azaldu dute, “lehentasuna delako guretzat”; horri ere erantzuteko asmo irmoa ikasturte berriaren hasieran.
Ikasturtearen balantzea ere egin du Duintasunak gaurko mobilizazioaren testuinguruan eta pozik azaldu da, sinistuta baitago pentsiodunen elkartea, eragile erreferente garrantzitsua bilakatu dela herrian, bai udalari begira, bai alderdi, sindikatu zein herritarrentzat ere. Lorpenen artean, E15 autobus linea mantentzea, “gizartearen mobilizazioaren garaipena izan da hori, herri mugimenduak lortu du guretzat hain garrantzitsua den zerbitzua mantentzea”. Puntu horretan, kritiko oso, eta haserre Duintasunakoak. Izan ere, PSE-EEri eta Isaac Palencia alderdi sozialistaren bozeramaileari egotzi diote herritarren borrokaren ondorioz lortutakoa “bereganatzen saiatzea”.
Urrian itzuliko da Duintasuna kalera mobilizazioekin, gutxieneko 1080 euroko pentsioak, osasun eta zaintza sistema publikoa, eta pentsio eta soldaten arrakalaren kontra: “Urriaren 7an izango da hori, eta berriro bertan aurkitu nahi zaituztegu guztiak”. Aurretik, irailean hainbat hitzaldi antolatuko dituztela ere jakinarazi dute, baina orduan emango dutela horien berri esan dute.
