Lezoko Beleak, indartsu eskolartekoan
Larunbatean jokoan izan zen eskrimako Eskolarteko Gipuzkoako Txapelketa. Uzta ona jaso dute Lezoko taldeko kideek.
Tiralari lezoarrak eta beste hainbat, larunbatean Donostian. Ikasturteko azken lehia izan zuten larunbatean Lezoko Beleak eskrima taldekoek Donostian, Pio Baroja kiroldegian. 50 tiralari edo eskrima kirolari bildu ziren han, tartean, herriko taldearen ordezkariak. Eskolarteko Txapelketa izan zuten jokoan, Beleentzako emaitza bikainekin: Benjamin Mailan, txapeldun izan ziren taldeka. Gainera, eskolarteko ligarako baliagarri izan zen larunbateko jardunaldia.
Unax Zalla Intxaurrandieta herrialdeko txapeldun izan zen mutilen Benjamin Mailan, eta nesken Kimu Mailan ere urrea Lezoko Beleentzat, Nico Dafauce Estevezen eskutik. Txapelketaz gain, ligan onenak izan dira bi tiralari horiek.
Kimu Mailan, berriz, mutiletan Ekhi Aiestaran Narciso bosgarrena izan zen txapelketan, eta haren anai Aratz Aiestaran Narciso seigarrena. Ligan hirugarren izan da Ekhi.
Nesken Haur Mailan, Lucia Garcia Agirregabiria hirugarren izan zen herrialdeko txapelketan, Julia Curto Otxoa bosgarrena, Sophia Hurry seigarrena, eta Abril Vicente Meana zazpigarrena. Kategoria horretan, baina mutiletan, Sawyer Bernard bederatzigarrena izan zen.
Azkenik, mutilen Kadete Mailan Nico Infante Arranz bosgarren izan zen larunbateko txapelketan, eta ligan bigarren postuari eutsi dio.
Lezoko Beleak taldeak hirugarren sasoia itxitzat eman du horrela, “goranzko bideari eutsi diogu”, esan dute. Hala, kluba egonkortu egin dela adierazi dute bertako arduradunek, eta euren oinarrian harrobiko lana lantzea eta kirola ezagutaraztea dagoela zehaztu dute.
