Branka ondo bideratua du San Juanek
KAE1 Ligako estropada guztiak irabazi ditu 'Erreka' traineruak. 'Batelerak' ontziak koska bat aurrera egin du.
'Erreka'-ko arraunlariak, atzo Zumaian ontziratu aurretik. Argazkia: Guka Asteburu oparoa San Juanentzat. KAE1ko bi lehietan Erreka-rentzat izan dira banderak; aurreko asteburukoarekin, hirutik hiru. Batelerek, berriz, ETEko estropadako bosgarren postuari eutsi zioten larunbatean, baina atzo koska bat gora egin eta laugarren izan ziren. Bi traineruen estropadak Donibane Lohizunen (larunbatean) eta Zumaian (atzo, igandea) izan dira.
San Juanen gizonen ontziak ondo bideratua du branka helbururantz. Liga hasieran amets zena, helburu zehatz eta egingarri bihurtu da: Eusko Label Ligara igotzeko kanporaketan aritzea ahalbidetzen duten KAE1eko lehen bi postuetako bat lortzea. Diskurtso zuhurra erabili behar da data hauetan beharbada, liga hasi besterik ez delako egin. Baina jada KAE1ek izango dituen hamalau estropadetatik hiru egin direnean, eta San Juanek hirurak irabazi dituenean, suziriak bota ez, baina baikor izateko moduan dira arrosak. Eta baikortasuna azken emaitza hori nola iritsi den ikusita indartzen da: bai Donibane Lohizunen zein Zumaian San Juanek segidan izan du Zarautz, 8 eta 7 segundora hurrenez hurren; Arkote bietan hirugarren izan da, Erreka-tik 16 eta 9 segundora. Aldeak ez dira izan hilaren 23ko Pasaiako estropadako segundoen amildegiaren adinakoak, baina distantzian erregulartasuna eman da. Beraz, Ligan lider garbi da traineru arrosa bigarren den Zarautzi zazpi puntuko aldea aterata.
Datozen bi banderak datorren asteburuan izango ditu San Juanek. Larunbat arratsaldez Camargon (17:00) eta San Fermin egunean Portugaleten (12:00).
Batelerak, gorantz
ETEko hirugarren estropadan, bosgarren izan ziren Batelerak Donibane Lohizunen larunbatean. Atzo Zumaian, ordea, aurrera urrats oso esanguratsua egin zuten: laugarren izan ziren, hirugarren izan zen Zarauztik segundo batera, eta Astillero bigarrenetik hirura. Zumaiak irabazi ditu asteburuko bi estropadak (San Juan baino bederatzi segundo azkarragoak izan ziren atzo). Beraz, eskifaia gazte-gazte hori eskarmentua palakada bakoitzean hartzen ari da, eta helburu handiak ezartzea bidezko ez izan arren, estropada bakoitzetik bestera zer eta nola hobetu badakitela soma daiteke. Noski, estropada bakoitzak bere berezitasunak ditu, zaila da batean ateratako ondorioak beste batean aplikatzea, emaitza bat lortzeko hainbat aldagai hartu behar direlako kontuan. Baina Batelerak trainerua ari da bidea egiten, eta ustez askoz indartsuagoak diren traineru horiek, ez dira hain urrun. Bosgarren dira sailkapen nagusian Batelerak.
Beraz, beste bi erronka izango dituzte datorren asteburuan San Juango emakumeek. Camargon lehiatuko dira larunbat arratsaldean (16:00) eta Portugaleten igande goizean (11:00).
Batelerak, atzo Zumaian. Argazkia: Guka.
