San Pedrok badaki zein den bere liga
Eusko Labeleko Coruñako eta Bueuko estropadetan 11. izan ondoren, San Pedrok garbi du aurtengo helburua mailari eustea izango dela.
Galiziak San Pedrori esan dio Eusko Label Ligaren barruan zein izango den bere liga partikularra. Jaitsierako play-off postuak ekiditea. Larunbatean Coruñan eta atzo Bueun 11. izan da Libia trainerua, bietan Bueu atzean izan duelarik. Liga asko dago aurretik oraindik, eta lehen bi estropadetan ikusi ondoren helburua zein izan daitekeen, horri eustea dagokio orain San Pedrori. Gogor borrokatu beharko dute moreek estropada bakoitzean beti bi traineru atzean uzteko, hau da, jaitsiera zuzeneko 12. lekua eta play-offeko 11. postua ekiditeko. Horretarako eta gehiagorako jarrera badute. Liga hasi aurretik bazekiten ez zela deus erraza izango. Beraz, emaitzez harago, berritik gutxi Asier Carballedak gidatutako arraunlarientzat.
Larunbateko Coruñakoan 11. izan arren, hurbil izan zituen sailkapen nagusian bai Cabo (San Pedro baino segundo bat lehenago iritsi zen helmugara) zein Kaiku (hiru segundo lehenago bukatu zuen estropada). Bueun, berriz, 10. izan zen Kaikuk 20 segundoko aldea atera zion Libia-ri, eta Lekittarra bederatzigarrenak 23. Alde handiak beheko postuetan estropada batetik bestera. Hala, Coruñakoa erreferentzia bezala hartzen bada, beheko postuetako saltsa betean da San Pedro, gai da han aurretik izan zituen horiei segundoak urratzeko. Kalparran gogor entrenatuko dira aste honetan, eta beharrezko doiketak egingo dituzte segundo horiek jan, eta sailkapen nagusiko postuetan gora egiteko.
Asteburuko bi estropaden emaitza zehatzak ikusteko, eta sailkapen nagusiaren berri izateko, baliatu esteka hau.
Beste bi estropada izango dituzte hurrengo asteburuan Eusko Labelekoek. Lehena San Pedrorentzat eremu ezagunean izango da, Fabrika Bandera, Donostiako Kontxan (larunbatean 18:20etatik aurrera). Bestea eremu historikoa da, Zierbenakoa, han jokoan izango baita XLI. Petronor Bandera (12:20etatik). Liga hasiera da. Urduritasunak orain ez du zentzu handiegirik. Ziur datorren asteburuko estropadetan sentsazio gozoagoak, beraz emaitza hobeak lortzen dituela San Pedrok. Beti helburu batekin: gutxienez bi traineru atzean uztea.