Miauka elkartearen aterpetxea, lepo
Leku eta laguntza faltagatik ezin diote erantzun behar gehiagori, eta ez dituzte momentuz katu gehiago hartuko.
Abandonatutako katuak ajso eta bizileku egonkorra aurkitu arte baldintza duinak eskaintzen dizkie Miauka elkarteak. Abandonatuta dauden katuak jaso eta aterpetxera eramaten dituzte bizileku egonkor bat aurkitu arte bizimodu egoki eta duina eskaintzeko. Miauka elkartea 2004an sortu zuten hainbat boluntariok, eta duela egun gutxi sare sozialen bidez jakinarazi du “gainezka” dagoela eta ezingo duela momentuz katu gehiagorik hartu aterpetxean.
Aterpea lepo izateaz gainera, gastuak biderkatu eta indar fisiko zein morala ere agortu zaiela aitortu dute boluntarioek, “urte sasoi hau oso gogorra izaten da, katuen sarrerak izugarri handitzen direlako, katakume asko iristen direlako, eta zoritxarrez, katu gehiago abandonatzen direlako”. Hori guztia gutxi balitz, katuen adopzioen erritmoa “murriztu” egiten dela ere esan dute.
Laguntza eske jasotzen dituzten deiak ere etengabeak dira eta ezetz esatea oso zaila egiten zaiela aitortu badute ere, beste aukerarik ez dutela erantsi dute: “Erakundeen laguntzarik ez izateak ere asko mintzen du. Horregatik guztiarengatik gelditu egin behar dugu, eta, gutxienez aldi baterako, gure aterpetxean katu gehiago hartzeari utziko diogu”.
Miauka elkartea lagundu nahi duten herritarrek hainbat bide dituzte horretarako sare sozialen bidez zabaldu dutenaren arabera. Hala Laguntzaile egin, bazkidetu, edota elkartearen gaineko informazioa zabaltzea dira bideetako batzuk. Horrekin batera kontu korronte zenbaki bat ere eman dute ekarpenak jasotzeko: ES72 2095 5080 451073508748. Teaming bidez ere egin daiteke dohaintza Miauka elkartea aukeratuta hilabetean euro batekoa. Egin klik hemen.
