Berritasunekin dator V. Kilometro Lezo jaialdia
Jaialdiaren bosgarren ekitaldia abuztuaren 23tik irailaren 15era bitartean izango da, eta bost emanaldirekin gorpuztu dute programazioa.
Kilometro Lezo jaialdiaren bosgarren ekitaldia gainean da, eta aurtengo edizioa berritasun esanguratsuekin datorrela adierazi dute Aitzol Saizar Lezoko Udaleko Kultura zinegotziak eta Xanti Val Kultura teknikariak. Aurtengo Kilometro Lezo abuztuaren 23tik irailaren 15era bitartean izango da, eta bost emanaldirekin gorpuztu dute programazioa. Lezoarrek bi antzerkiz, zirku ikuskizun batez eta bi dantza emanaldiz gozatuko dute herriko hainbat txokotan.
Kilometro Lezok bost urte beteko ditu aurten. Jaialdia udalak sortu zuen, pandemia garaian, eta berau abiatzeko arrazoiak gogorarazi ditu Saizarrek: “Sektoreak eta sortzaileek bizi zituzten une gogorrak arintzeko, udalak bere hondar alea jarri nahi izan zuen”. Ordutik, jaialdia sendotzen joan dela adierazi du Kultura zinegotziak, eta aurtengoa bi berritasun nabarmenekin egingo dela aurreratu du.
Lehen aldaketa da Kilometro Lezo jaialdi ibiltaria bihurtuko dela. Orain arte, emanaldi guztiak Lezo Herri Eskolako patioan egin dira, baina aurten, Lezoko txoko ezberdinetara zabalduko da festibala, publiko eta espazio berrietara iritsi ahal izateko. Hala ere, ikastetxeko patioak emanaldi bat jasoko du: abuztuaren 24an izango da, eta Orratx! Antzerki Taldeak Ubu errege antzezlana interpretatuko du, 22:00etan. Gainerako agertokiak Lopene plaza, Goiko plaza eta Santo Kristo Basilikaren pareta izango direla jakinarazi du Saizarrek.
Jaialdia ibiltari bihurtzearen helburua “auzo bizitza sustatzea” dela nabarmendu du udal hautetsiak: “Halako emanaldiak jasotzera ohituta ez dauden espazioetara joan nahi dugu, nolabait, eskaintza kulturala herrian barrena zabaltzeko, eta, bide batez, publiko berria erakartzeko. Erronka bat da, emanaldi guztiak espazio bakarrean antolatzea errazagoa delako, baina uste dugu dibertsifikazioaren aldeko apustuarekin guztiok irabaziko dugula”.
Beste aldaketa da Kilometro Lezo Open Kale Euskadiko Arteen Jaialdien Sarean sartu dela. Sare horren barruan 15 jaialdi daudela baietsi du Saizarrek, eta horietako bat da Kilometro Lezo. Sare horren barruan ere Oarsoaldeko beste jaialdi bat dago: berriki izan den Pasaiako Dantza Festibala.
Saizarrek zehaztu du Kilometro Lezo jaialdi sare “erreferente” horretan sartzea “urrats kualitatibo handia” izan dela: “Kilometro Lezo kalean antolatzen diren jaialdien sarean kokatzen da, are eta ikusgarritasun handiagoa ematen dio, publiko gehiago erakartzeko bozgorailu aparta da eta gurera ekartzen ditugun sortzaileen lanen kalitatea bermatzen da”.
Programazioa
Kilometro Lezoren bosgarren ekitaldia “programazio erakargarriarekin” lurreratuko dela adierazi du Xanti Valek. Kultura teknikariak nabarmendu du abuztuaren 23tik irailaren 15era “maila handiko” ikuskizunekin eta sortzaileekin gozatzeko aukera izango dela Lezon. Jaialdiaren filosofiari jarraituz eta hurbiltasunarekin kultura sustatuz, Valek zehaztu du “ekarpen interesgarria” egiten saiatzen direla, “zentzuzko” bi norabidetan: “Batetik, Euskal Herriko sortzaileei plaza bat eskainiz, eta, bestetik, lezoarrei eta bisitan etorriko diren pertsonei maila handiko ikuskizunak eskainiz”.
Abuztuak 23
- Antzerkia: ¡Dale Ramón!
- Konpainia: Trapu Zaharrak.
- Non: Lopene plazan.
- Ordua: 20:00etan.
Abuztuak 24
- Antzerkia: Ubu errege.
- Konpainia: Orratx! Antzerki Taldea.
- Non: Lezo Herri Eskolako patioan.
- Ordua: 22:00etan.
Abuztuak 30
- Zirkua: Aha! Circo.
- Konpainia: Alas Circo Teatro.
- Non: Lopene plazan.
- Ordua: 20:00etan.
Abuztuak 31
- Dantza: Geure(r)a, dantza bertikal ikuskizuna.
- Konpainia: Harrobia.
- Non: Santo Kristo Basilikaren paretan.
- Ordua: 23:00etan.
Irailak 15
- Dantza: Haurreskolari.
- Konpainia: Tio Teronen Semeak.
- Non: Goiko plazan.
- Ordua: 19:00etan.
