Txanda irabaztera aterako da bihar Hibaikako emakumeen trainerua
Erronka nagusiak play-offa eta zuzeneko jaitsiera saihestea ditu aurten Hibaikaren emakumeen ontziak, seigarren postua lortzea da marra gorria Iñaki Mendizabalek entrenatzen duen taldearentzat.
![](https://oarsoaldea.hitza.eus/site/files/2024/07/dsc07951.jpg)
Erronka nagusiak play-offa eta zuzeneko jaitsiera saihestea ditu aurten Hibaikaren emakumeen ontziak, seigarren postua lortzea da marra gorria Iñaki Mendizabalek entrenatzen duen taldearentzat. Aurreko asteburuan hasi zuen lehia Euskotren Ligan, eta hasierako bi estropaden ostean, bide onetik, lanak bikain eginda doala Madalen ontzia esan daiteke.
Bosgarren postuari ere egin dio keinu Mendizabalek, “Hondarribiarekin borroka nola doan ikusi behar horretarako. Printzipioz, seigarren postu hori bermatzea da helburua”.
Galizian egindako bi estropadei begira irakurketa positiboa Mendizabalek, “aurreneko egunean ez ginen oso fin ibili, ez ginen ondo moldatu itsasora, mugitua zegoen eta ezin izan genuen gure lana ondo egin. Igandean, berriz, akatsa horiek zuzenduta, estropada biribila atera zitzaigun. Lehenengo luzean, hasiera-hasieratik buru hartuz, bukaera arte. Azkeneko minutuetan Hondarribiak estutu gintuen, baina gai izan ziren arraunlariak abantaila mantentzeko”.
Ez du lan erraza izan Mendizabalek, ezta arraunlariek ere. Izan ere, baja ugari izan ditu denboraldi honetan Hibaikaren emakumeen taldeak. Hala berretsi du entrenatzaileak, “klubarentzat zaila izan da, talde osoarentzat, baina gehienbat arraunlarientzat. Kopuru handi batek uztea erabaki zuen; bateren bat beste talderen batera joan da, erabaki hori hartu zuen. Ez da batere erraza izan. Kopuruz gutxi geunden, eta gazte mailatik tira behar izan dugu astebururo trainerua uretara bota ahal izateko. Azken unean kanpotik ekarri behar izan ditugu arraunlari batzuk, hemen arraun munduak taldeak badaudelako, baina arraunlariak gutxi, eta zaila izaten da talde batetik bestera aldatzea. Taldea osatzeko Alacanteko —Herrialde Katalanak— lau arraunlari ekarri behar izan ditugu. Azken unean etorri dira eta orain momentuz, moldatzen ari dira. Ea udara pasa ahala hobetzen joaten garen”.
Arazo handiena itsasoan dutela dio Mendizabalek, “ez gaude ohituta itsasoan ibiltzera, bai ur zakarretan Mediterraneo aldean haizeak jotzen duenean gogor, haize olatu hori sortzen da eta apur bat ohituta badaude, baina itsaso zabalean olatuekin ez”. Erronka, horretan hobetzea dute, beraz.
Biharko estropadarako kiniela eskatuta, Donostian zein emaitza espero duten galdetuta argi mintzatu da Mendizabal, “nahia da seigarren postu hori behintzat egitea, ildo beretik jarraitzen badugu, gaizki ez dut uste egingo dugunik, baina sinatuko nuke seigarren egitea. Hortik gora, ongietorria guztia”. Argi esan du, biharko Donostiako estropadan, “tanda irabaztera” aterako dira.
Hibaika zaleei ere egin die deia emakumeen traineruaren entrenatzaileak estropadetara etor daitezen taldea animatzera: “Estropada politak izan dira joan den asteburuko biak, eta dagoen mailarekin, bigarren zein lehen txandan, erronka polita egongo da. Bide batez, Hibaika animatzera etortzeko deia egin nahi diot jendeari”.