25 urte uhinetan oiartzuarren erakusleiho izaten
Oiartzun Irratiaren seinalea lehen aldiz jaso zela mende laurden beteko da etzi. Komunitatea ehuntzen jarraitu nahi dute, hilaren 13rako festa bat antolatuta. Herritarrek irratiaren mikrofonoa zabalik dutela gogorarazi dute.
Euskarazko komunikabideen olatuak, pasa den milurtekoaren bukaeran eta egungoaren hasieran, hainbat medio berri ekarri zituen: lau udalerrietan euskarazko aldizkariak zeuden, eta Oarso Telebista ere etxeetako pantailetara iristen hasi zen. Tartean zen Oiartzun Irratia. 1999ko uztailaren 7an zabaldu zen irratiaren seinalea estreinakoz. Kontakatilu Irratia zenaren azpiegitura aprobetxatu zuten, udalaren laguntzarekin. Emisio pilotua bezperan egin zuten, sanferminetako txupinazoarekin. Ane Lardi Enbil izan zen uhin-frekuentzia elikatzeko ardura izan zuena, 20. urtemugaren harira irratiari buruz egindako erreportajean gogorarazi zuen moduan.
Ordutik urak bere bidea jarraitu du, eta mende laurdenaren atarian dago irratia. Aldaketa garrantzitsu bat izan du azken urteetan: Arraskuelarre kaleko lokala utzi, eta euskalgintzako gainontzeko eragileekin batera partekatzen du Landetxe eraikin berriko azkeneko solairua. «Irrati zaharrak bazeukan bere xarma, zerbait berezia, baina pixka bat iluna zen», gogorarazi du Alazne Etxeberria esatariak. «Oraingo honek leihoa du, argia sartzea, eta plazan jendea ikustea… Hori beste zerbait da. Oiartzun erdi-erdian dago, eta jendea irratira hurbiltzeko errazagoa da», gaineratu du.
Euskalgintzako eragileekin duten harremanaren garrantzia azaleratu du Itsaso Guemesek, irratiko beste esatariak. Hori esan baino segundo batzuk lehenago adibide grafikoa gertatu da: AEK-koak sartu dira estudioan, zuzeneko emisioa bukatu dela jakitun, zerbaiti buruz galdezka. Azken solairua Marx anaien kamarotearekin alderatu du Guemesek, pertenentzia sentsazio bat dutela adierazi du. «Zerbaiten parte zaren sentsazioa irabazi dugu, eta espazio bat izatea. Solairu bat daukagu euskalgintzakoontzat, eta hori garrantzia ematen zaion erakusle da».
Oraindik jende asko beheko estudio zaharrera joaten direla esan dute, umoretsu, nahiz eta Landetxeko eraikinak «ikusgarritasun handiagoa» duen. Gainera, asteburuetan eraikina —irratia ez— irekita dagoenez, larunbat eta igandetako ekitaldietara hurbiltzen direnek irratia gertuago senti dezakete. Estudio berriak bisitariak zur eta lur uzten dituela adierazi dute, eta baduela zaharrak ez zuen «seriotasun handiagoa». «Zentralitatea» ez da bakarrik fisikoa; udalak ere apustua egin du haien alde. «Udalarekin elkarlana estutzen ari gara. Ikusi dute proiektu interesgarria dela, eta zabaldu edo ireki nahi dute. Kolaborazio berriak sortu nahi dituzte, eta herritarrak hurbildu. Ideia ona baldin badauka, nahi duena etor daiteke hona», esan du Etxeberriak. Guemesek gehitu du: «Beti egon da mikrofonoa irekia, baina orain bultzada berri bat eman nahi diogu».
Festa, hilaren 13an
Oiartzun Irratia osatzen duen komunitatea hilaren 13an elkartuko da. Bazkari handi bat egingo dute, auzoetako elkarteetako sukaldari iaioenek prestatutakoa. Sarrerak salgai daude irratian bertan eta Landetxen, 15 euroan helduentzako eta 8an haurrentzako.
Haurren txokoarekin hasiko dira, ikastetxeetako guraso elkarteekin eta Abaraxkarekin hitzartuta. Eguerdian desafio handia egingo dute herri kiroletan, herriko gazte eta beteranoen artean (HITZAn porra egin daiteke). Ekitaldiaren ondoren etorriko da bazkaria, eta Joxe Leon Kazabonek eta Irati Odriozolak girotuko dute postrearen garaia, arrakasta handia duen bingoa jokatu aurretik. Kopla txapelketaren sariak nork jasoko dituen herritarrek erabakiko dute. Mxk3r eta Dantzall Soundek hartuko dute girotzearen lekukoa, eta Tio Teronen Semeen hirugarren ikuskizunaren estreinaldiarekin bukatuko da ospakizuna.
Laguntzen ari direnei eskerrak eman dizkiete, beraiekin egindako auzolanik gabe «ezinezkoa» litzatekeelako horrelako ospakizun bat aurrera ateratzea. «Jendeak irratia maite duela sentitzen dugu», esan du Etxeberriak.
Programazioa
Etxeberriak eta Guemesek irratiaren programazioari errepasoa eman diote, egunez egun, Arguyuan saioaren barruko atal edo saioekin. Astea Joxemi Lopez eta Kirolez blai-erekin hasten dute. Joxe Mari Mitxelenarekin herriko ondarea ezagutzen dute, eta Oarso Bidasoko Hitzarekin errepasoa ematen diote aktualitateari.
Asteartetan irratiko saio izarra iristen da: Zana zalako. Herriko gonbidatu bat eramaten dute, eta bere bizitzari buruzko elkarrizketa «intimoa» egiten diote. Esatarien arabera, «arrakasta handiena» duen saioa da. Eltze tartin sukaldaritza saioa egun horretan izaten da, Gazteluko Haritz Ertzibengoarekin. Hilean behin, ziklizitateari buruz aritzen dira Loregorrirekin.
Asteko hirugarren egunean nazioarteko gaiak hizpide izaten dituzte, Txente Rekondorekin, eta Udalaren tartea espaziora udaleko ordezkariek gaurkotasunezko gai bat eramaten dute. Ostegunetan, Literari euskal literaturari buruzko programa izaten dute, eta Lanin egitasmoaren tartea ere bada. Astea bukatzeko, bideo-jokoak eta bertsoak izaten dituzte hizpide, eta asteko sarien zozketa egiten dute. Sariak herriko establezimenduek ematen dituzte; 40tik gora dira irratia babesten dutenak. Tarte hori oso gustuko dute esatariek, entzuleekin solasaldi «naturalak» suertatzen direlako.
Datorren denboraldirako haurren literaturari buruzko saioa estreinatuko dute, baita webgune berria ere. Gala batean aurkeztu nahi dituzte berritasunak. Oiartzuarrak gonbidatu dituzte komunitatearen parte izatera, mikrofonoa irekita dutelako. Oiartzuarren erakusleihoan parte hartzeko baldintza bakarra dago: euskaraz aritzea.