Iglesiasek agindu bezala "beste bertsio" bat eman du Hibaikak Donostian
Hibaikako gizonen ontziak estropada polita egin zuen larunbatean Donostian. Bosgarren sailkatu zen, baina Busturialdeko ontzitik ehunenetara, eta sailkapen orokorrean atzetik dituen bi ontziei minutu luzeko aldea aterata.
Hibaikako gizonen trainerua erdian larunbateko estropadan. Argazkia: Dani Novas Beste bertsio bat emango zutela larunbateko estropadan Kontxako badian esan zuen David Iglesias Hibaikako gizonen entrenatzaileak. Esan eta egin. Euren tandako azkarrena izan zen Madalen ontzia alde handi-handiarekin minututik gorako tartea aterata Santoña eta Lutxanako traineruei. Lehen luzea baldintza gogorretan, itsaso mugituan egin zuten lehen txandan ateratako hiru ontziek, eta bi txanden baldintzak ez ziren berak izan. Erabateko nagusitasuna izan zuten Donostiako estropadako lehen tanda horretan, hasi eta buka lehen postuan, alde ikaragarriarekin.
Lehen ziabogarako 12 segundoko aldea atera zion Santoñari Hibaikak, eta 13 Lutxanari. Bigarren ziabogan, denbora tartea zabaldu zuten errenteriarrek, eta hirugarrenerako minutukoa zen alde hori beste bi ontziekin. Azken luzean alde hori handitu egin zuen Iglesiasek entrenatzen duen tripulazioak minutu eta hogeita sei segundora utzita; 23.08,71 egin zuen Hibaikak. Iglesiasek agindutako beste bertsio hori eman zuten, zalantzarik gabe.
Baldintzak aldatu egin ziren bigarren txandarako, eta euria eta haizea azaldu baziren ere, itsasoak bareago zirudien. Bigarren tanda horretako lau ontziek hobetu egin zuten Hibaikak egindako denbora, baina Busturialdeatik oso-oso gertu gelditu zen, 10 ehunen tarteak bizkaitarren alde egin zuen. Castreñak ere hobetu zuen Hibaikaren denbora, baina harekin ere sei segundo exkaxeko tartea. Nagusi Astillero izan zen, eta Donostiarra bigarren. Hibaikak, bosgarren egin zuen; sailkapen orokorrean ere bosgarren postuan dira.
Astillero eta Donostiarra goitik ari dira, maila altua ematen, baina Hibaikak larunbatean erakutsi zuen Castreña eta Busturiarekin lehia bizi-bizian aritzeko gaitasuna baduela. Hurrengo KAE2 Ligako estropada Errenteria-Oreretan jokatuko da bi luze eta ziaboga bakarrarekin erlojupean. Oiartzun ibaian hasi eta buka, Pasaiako Badia aldean egingo dute lehia. Etxean izango dira, eta lehen eskutik ezagutzen dute arraun eremua Iglesiasek entrenatzen dituen arraunlariak, eroso ariko dira, beraz, ligako bosgarrenean. Igandean jokatuko den estropada puntuak biltzeko aukera bikaina izango dute errenteriarrek, eta ziur, ez dutela hutsik egingo.
