Bost jokatu, bost irabazi
Asteburuan jokatutako biak bere eginda, 'Erreka' traineruak jokoan izan den dena irabazi du. 'Batelerak' trainerua, erregular.
Bost jokatu eta bost irabazi. Hori da KAE1eko San Juanek ligan daraman martxa. Play-offera sailkatzeko faborito nagusi bihurtu da Erreka ontzia asteburuko estropadak eta gero. Batelerak trainerua, berriz, bosgarren izan da asteburuko bietan. Bai gizonen zein emakumeen estropada horiek Camargon eta Portugaleten jokatu dira.
Arraun erakustaldia egiten ari da gizonen trainerua. Erraz esaten da izan diren estropada guztiak irabazi dituela, baina hori uretan azaldu behar da. Orain arteko bostetan, gainera, askotariko itsaso kondizioak izan dituzte traineruek, eta denetan moldatu da egoki Joseba Fernandezek gidatzen duen eskifaia. Larunbatean Camargon sei segundoko aldea atera zion bigarren izan zen Arkoteri, baina atzo Portugaleten egindakoan 13ra igo zuten zuloa sanjuandarrek, bigarren Santurtzi izan zelarik. Ligan lider, igotzeko kanporaketan izateko hautagai baino, jada egitate dira.
KAE1 ligako asteburuko estropaden berri zehatz izateko, klik egin hemen.
Emakumeen trainerua, berriz, erregulartasun handia ari da azaltzen orain arte egindako sei estropadatean. Hala, asteburuan, bosgarren izan ziren bai Camargokoan zein Portugaletekoan. Badirudi aurrean laukote sendo bat duela, Astillerok, Zumaiak, Zarautzek eta Kaikuk osatutakoa. Haiei segundoak kentzea latza den arren, ETE ligaren bigarren zatian saiatuko dira alde horiek txikitzen, agian, laukote hori boskote bihur dadin goiko postuen aldeko borroka horretan.
ETE Ligako asteburuko estropaden berri zehatz izateko, klik egin hemen.
