San Pedrok goranzko joerarekin jarraitzen du
'Libia' hamargarren izan da asteburuan jokatutako bi estropadetan, hortaz, koska bat gora egin du lehen bi jardunaldiekin alderatuta. Hala ere, salbazioa puntu batera aldendu zaie.
Argazkia: Sanpedrotarra Arraun Elkartea. Asteburuan Eusko Label Ligako hirugarren eta laugarren estropadak jokatu dira. Larunbatean XVI. Fabrika Bandera lehiatu zen Donostian, eta atzo, Zierbenako XLI. Petronor Bandera. Estreinako asteburuan, Coruñako eta Bueuko estropadetan, azken-aurreneko postuan sailkatu ondoren, koska bat gora egin du San Pedrok Euskal Herriko lehen estropadetan, bietan hamargarren izan baita, 6 puntu poltsikoratuta.
Galiziako estropaden moduan, Bueu azken postuan sailkatu da Donostian eta Zierbenan; hortaz, Galiziako ontziak azken postuan jarraitzen du, 4 punturekin. San Pedrok bi traineru utzi ditu atzean bi jardunaldietan, baina ez ontzi bera. Donostian Kaiku sailkatu zen azken aurreneko postuan, eta Zierbenan, aldiz, Lekittarra. San Pedrok goranzko joerarekin jarraitzen du, eta azken asteetako sentsazioak onak izan direla onartu du berriki Xabier Isasa presidenteak, Hitzari egindako adierazpenetan.
Puntuetan, ordea, galera izan dute moreek, eta sailkapeneko hamaikagarren postuan jarraitzen dute, 10 punturekin. Hamargarren Kaiku da. Bizkaitarrek 14 puntu dituzte, sanpedrotarrek baino 4 gehiago. Asteburu honetan 7 puntu erdietsi dituzte, pasaitarrek baino 1 gehiago. Donostian azken-aurren izan baziren ere, Zierbenan fin ibili ziren bizkaitarrak, eta zortzigarren postuan sailkatu ziren.
Isasak adierazi zuen, igo berria den taldea izanik, aurreneko helburua azken postuak saihestea dela. Azken postuan den Bueurekiko 6 puntuko errenta du Libia-k, hortaz, jaitsiera zuzena ekidingo lukete. Hamaikagarrenak play-offa jokatuko du, eta postu hori saihestu nahi du San Pedrok. Aurrez aipatu bezala, hamargarren den Kaikuk 4 puntu ateratzen dizkio Libia-ri. Bederatzigarren Cabo da, eta haiek errenta handiagoa dute San Pedrorekiko, 8 puntu gehiago baitituzte.
Argi dago San Pedrok borrokan jarraitu beharko duela, baina Isasak onartu zuen moduan, bide onetik doaz, eta gerra emateko prest daude.
