Herriaren etorkizuna irudikatuko dute EHUren Udako Ikastaroen eskutik
Agustinak Zentroak hartuko du Errenteriako Udalak eta EHUk elkarlanean antolatu duten ikastaroa irailaren 6an, 2040ra begira jartzeko.
![](https://oarsoaldea.hitza.eus/site/files/2024/07/dsc00720.jpg)
Etorkizuneko hiri eta herri desiragarriak: mapa bat utopiarako ikastaroa antolatu dute Errenteriako Udalak eta EHUren Udako Ikastaroek elkarlanean. Irailaren 6an izango da Agustinak Zentroan, eta aurreko urteetan udalgintza komunitarioaren gainean hausnartzeko hasitako bidearen segida da. Ikastaroaren hartzaileak, etorkizun bizigarrietan, gobernantza ereduetan eta gizarte mugimenduetan interesa duten pertsonak dira oro har, eta bereziki, herriko eragileak zein biztanleak, udalgintza arloko profesionalak, kargu publikoak, eta gai horiekin zerikusia duten diziplinetako ikasleak.
Hortzmugan 2040. urtea jarri dute. Hala azaldu zuten atzo ikastaroa aurkezteko Agustinak Zentroan egindako aurkezpenean: “Errenteriako Udalak herriaren plan estrategiko berri bat osatzeko lanak hasiko dituen unearekin bat eginez antolatu du etorkizunerako begirada lantzeko plaza izan nahi duen ikastaro hau. Gaurtik 2040ko gizarte eta herri desiragarria irudikatzea izango dute erronka ikastaroan parte hartuko dutenek eta irudikatutako horren bidean pausoak emateko kontutan izan beharreko gakoak mahai gaineratuko dituzte. Horretarako, hainbat gaietan aditu direnen ekarpenak jasoko dituzte ikastarora hurbilduko direnek, guztiak ere giltzarri etorkizuna irudikatzeko garaian”.
Hori horrela, hasteko hitzaldi bana eskainiko dute goizean Alba Garmendiak eta Igor Ahedok; utopien ezaugarriez batak, etorkizuna komunitatean pentsatzearen garrantziaz, besteak. Ondoren beste bost adituren txanda helduko da, guztiak gazteak, eta hain justu gaztetasun ikuspegi hori jarraiko dute etorkizuneko erronkak lantzeko hainbat erpinetatik: tokiko garapena, trantsizio eko soziala, feminismoa, kultura eta etorkizuneko subjektu herritarren perspektiba. Hizlariak, Naia Begiristain Etxezarreta, Gorka Laurnaga Peña, Jone Arrazola Maiztegi, Mikel Urdangarin Irastorza, eta Maialen Akizu Bidegain.
Arratsaldean goizean landutako ideia horiek Errenteria-Oreretan lurreratzea izango dute erronka. Horretarako, euren jarduna esparru profesional desberdinetan garatzen duten Errenteriako 6 herrikidek, herria 2040an nolako izatea nahiko luketen azalduko dute, baita desiragarria den herria lortzeko eman beharreko pausoak irudikatu ere, goizean entzundakoak kontuan hartuta. Egiteko hori izango dute Arantxa Iraola Alkorta, Enara Maiz Gonzalez, Youssef Maes, Jon Maya Sein, Maitane Basasoro Ziganda eta Beñat Irasuegi Ibarrak. Jardunaldiaren sintesia bi sortzaileren eskutik helduko da, Idoia Beratarbide ikusizko artista oiartzuarra eta Oier Gillan idazle, kazetari eta antzerkigile errenteriarraren eskutik hain zuzen ere.
Izena ematea zabalik
Izena emateko aukera dagoeneko zabalik da (egin klik hemen). Antolatzaileek herritarrak eta eragileak bertan parte hartzera gonbidatu dituzte, “bihar izan nahi dugun herria elkarrekin pentsatu eta gaurdanik eraikitzen hasteko”. Gainera, aurreko urteetan egin bezala Errenteria-Oreretako herritarrek ikastaroan dohainik parte hartzeko aukera izango dute. Gainontzekoentzat berriz, matrikula orokorra 40 eurokoa izango da, matrikula murriztu orokorra 34 eurokoa, matrikula exentzioa dutenentzat 28 eurokoa, Elkar txarteldunentzat 34 eurokoa, eta euskaltegi eta autoikaskuntza zentro homologatuetako ikasleentzat, 34 eurokoa. Ikastaroetan presentzialki edo online parte hartzeko aukera izango da.