Errenta aitorpena euskaraz egiteagatik, ondo jatera
Ogasunaren aurrean euskara erabili dutenen artean zozketa egin, eta otordu bana irabazi dute eskualdeko lau biztanlek.
Lau herrietako irabazleak, sariekin. Oarsoaldeko Euskara Batzordeak —eskualdeko lau udalek dute ordezkaritza bertan— 2023ko errenta aitorpena euskaraz egitera deitu zituen herritarrak. Hala egin zuten askok, eta horien artean promestutako zozketa egin dute. Hilaren 4an egin zuten zozketa hori, eta zortedun bakoitzak bi lagunentzako otordua irabazi du eskualdeko lau herrietako jatetxe banatan.
Errenteria-Oreretako sariduna Leire Pikabea izan da. Hango Bixigarri jatetxean gozatu ahal izango du otorduaz. Saria Errenteriako Udaleko Hizkuntza Berdintasunerako zinegotzi Leire Maziziorrek eta Bixigarriko Alex Oier Gonzalezek eman zioten.
Lezon, berriz, Lourdes Lizarazuri egokitu zaio ogasunaren aurrean euskara erabiltzeagatik saria. Aiton Borda jatetxean gozatuko du sari hori. Iker Salaberria Lezoko Udaleko Euskara zinegotziak eman zion saria.
Amazkar tabernako gutiziak dastatu ahal izango ditu Maialen Lekuonak. Hark irabazi du oiartzuarren otordua. Saria Aiako Harria Gaztelumendi Euskara zinegotziak eman zion, aurrez aurre.
Pasaiako irabazlea, Aitor Gurrutxaga. Donibaneko Ontziola jatetxera joango da pasaitarra, pozik asko. Laura Ré Euskara zinegotziak eta RKA aholkularitza establezimenduko Pitu Badiolak eman zioten saria.
Eskualdeko udaletako ordezkariek deia egin diete bertako biztanleei: jarri dezatela, ogasunaren aurrean bezala, euskara toki guztietan erabiltzen. Aitorpena oraindik ere gaztelaniaz egiten dutenak euskaraz egitera animatu dituzte.
