Luxuzko kontzertua ermitan, Landarbaso abesbatzarekin
Honakoa Madalen aurreko kontzertuaren 34. ekitaldia izango da. Berezia da kontzertu hori Landarbaso abesbatzarentzat, eta bere unerik gorenean emanaldi bikainaz gozatzeko aukera eskainiko die herritarrei.
Landarbaso abesbatzaren emanaldiaren aurkezpena. Argazkia: Herri bizia Madalen aurreko kontzertua eskainiko du Landarbaso abesbatzak hilaren 19an, ostiralarekin. Ez da nolanahikoa hitzordu hori; batetik, hogeita hamalaugarren urtea izango du Errenteria-Oreretako abesbatzak kontzertua eskaintzen duela; bestetik, Austriatik heldu berria da Landarbaso, Spittal an der Drauko txapelketatik eta hirugarren postuan sailkatzeaz gainera polifonia atalean, derrigorrezko obraren sailean interpretaziorik onenaren saria eskuratu dute errenteriarrek. Hilaren 19koa beraz, goi mailako emanaldia izango da, luxuzkoa, eta gainera, doakoa.
Gaur aurkeztu dute ekitaldia Lurdes Uranga Maria Magdalenaren Lagunak elkarteko kideak eta Iñaki Tolaretxipi Landarbaso abesbatzaren zuzendariak. Elkarte horrek azken 11 urtean izan dela kontzertu antolaketan laguntzailea nabarmen jarri du Urangak, baina gainontzeko urte guztietan Landarbaso izan dela arduratu dena, eta aitortu dio abesbatzari hainbeste urtez kontzertua bizirik mantentzeko egindako lana. Madalenaren ermita espazio aproposa dela musika emanaldietarako ere esan du Urangak, “hala esaten digute bertan emanaldia egiten dutenek, akustika paregabea duela. Guretzako plazera da Landarbaso bertan izatea emanaldia eskaintzen”.
Ikasturtearen bilana ere egin du Urangak, eta hala, aurten 17 kontzertu egin direla ermitan aipatu du, “horietatik sei elkarteak antolatu ditu, eta beste 11k berriz, herriko hainbat eragilerekin egindako kolaborazioen ondorio izan dira”.
Tolaretxipik hartu du hitza gero. Madalenen aurrekoa, kontzertu “berezia” dela eurentzat aitortu du: “Batzuetan entsegu gisa baliatzen dugu lehiaketaren batera edo emanaldiren baterako, eta oraingoan berriz, lehiaketa batetik bueltan egingo dugu emanaldia”. Austriara begira jarri da ondoren, Spittal an der Drauko txapelketara. Esperientzia ikaragarri aberasgarria izan da abesbatzarentzat, hala esan du zuzendariak: “Esperientzia gogorra izan da abesbatza gorenekin lehiatu garelako bertan, maila handiko taldeak izan dira, eta hirugarren sariarekin eta derrigorrezko obraren interpretazio onenaren aitortzarekin itzultzea ikaragarria izan da”.
Pozik oso emaitzarekin abesbatza. Ikasturteko lanari begirada ere Tolaretxipik; 2023an 51 kontzertu eskaini bazituen Landarbasok, aurten muga hori gainditu dutela jarri du nabarmen, “astakeria da kopuru hori”.
Hilaren 19ko emanaldia 20:00etan izango da eta programa zehaztu gabe badute ere, ardatza, Austriako txapelketara eramandako errepertorioa izango dela aurreratu du, “%80 izango da bertara eraman genuena”. Herritarrak emanaldira gonbidatu ditu Tolaretxipik, “aukera polita da Landarbaso entzuteko, momentu oso interesgarrian gaude, Europan abesbatza erreferentea gara”. Horren harira, anekdota baterako tartea ere hartu du: “Austrian izan garenean txapelketaren bi epaimahaikidek esan zidaten Landarbasoren zale direla. Ohore bat da, benetan pozgarria halakoak jasotzea”.
Ordubete inguruko saioa izango da, zalantzarik gabe ederra eta gorena, Tolaretxipik esan duen moduan, “ikusgarria izango da”. Ikusgarria eta entzutekoa, ziur. Hitzordua, hilaren 19an, ostirala 20:00etan Madalenaren ermitan; sarrera doakoa izango da.
