Txupinazo festa egingo du Zintzilik irratiak denboraldia bukatzeko
Hilaren 21ean igandearekin egingo du txupinazo festa irrati libreak eta hori baliatuko du 39. denboraldiari ginga jartzeko.
![](https://oarsoaldea.hitza.eus/site/files/2024/07/zintzilik-irratia_egoitza.jpg)
Txupinazo festa egingo du urtero bezala Zintzilik Irrati libreak. Hilaren 21ean izango da, igandea, eta festa horrekin 39. denboraldia bukatuko du gainera. Programa berezia antolatu dute, baita formatu txikiko kontzertua ere txupinazo festa horretarako.
17:00etan ekingo diote Zintzilikekoek irratsaio bereziari eta bertan elkarrizketak, muska eta txupinazoa zuzenean entzuteko aukera emango dute. 19:30ean, berriz, barra zabalduko dute, eta jatekoak eta edatekoak eskainiko dituzte, baina batez, nabarmen jarri dutenez, “konpainia hoberena”. Kontzertuari dagokionean, The Bedbreakers bikoteak emanaldi akustikoa eskainiko du; bertsioak egiten dituzte.
Festarekin bukatuko dute denboraldia, eta hortaz, udan barrena ez da saiorik izango Zintziliken, bai ordea musika ez komertzialarekin gozatzeko aukera. Irailean itzuliko dira 40. denboraldia martxan jartzeko gogo eta ikusioz, eta hainbat jarduera eta sorpresa iragarri dituzte, adi beraz, seinaleari. Deia ere luzatu dute, Zintzilik irratian parte hartzera animatzeko. Interesdunek harremanetan jarri behar dute horretarako irrati libreko kideekin sare sozialen bidez.
Baliabide gutxirekin, baina zutik
Irailean hasiko duen denboraldiarekin laugarren hamarkada beteko du Zintzilik irratiak uhinetan programazio eta musika alternatiboa eskaintzen. Ez dit irratiak baliabide gehiegi, baina gutxi izanik ere 39 urte luzeko bidea bete du, eta martxan jarraitzen dute gaur gaurkoz. Horren erakusle, irrati librearen parrilatik pasatako programak dira: Kuir Artxiboa, Desfase Lunar, Hipotedisk, Kalez kale Soul, Gora Mikele, Gora Estratosfera, Hertziok, WKD Kosmik, Topa In Topo, Akerbeltz, Txarletas, eta Informatiboak horietako batzuk dira.