Aparkalekuen araudiari ekarpenak egiteko aukera, hilaren 22ra arte zabalik
Lau barrutietako topaguneak egin ondoren, ekarpen orokorrak aurkezteko epea zabaldu du Pasaiako Udalak.
San Pedron egin zen barruti arteko lehen batzarra. Barruti guztietan informazio eta ekarpen erronda espezifikoa egin ondoren, udalerriko aparkalekuen araudi proposamenari ekarpen orokorrak egiteko epea zabaldu du Pasaiako Udalak. Horiek egiteko epea hilaren 22ra artekoa dela jakinarazi du herriko etxeak. Herritarrek euren iritzi edo aportazio horiek udalaren webgunearen bitartez egin ditzakete, barrutika. Egin klik hemen hara iristeko.
Dezenteko bidea egina du dagoeneko araudiaren zirriborroak. Ekaina bukaera eta uztail hasiera artean herritarrekin bildu dira udal gobernuko kideak barruti guztietako herritarrei zirriborroaren berri zuzenean emateko. 200 bat lagunek parte hartu dute lau batzar horietan. Baikor baloratu ditu topagune horiek Mikel Garcia Peñil Mugikortasun zinegotziak: “Bilera ireki eta aberasgarriak izan dira. Bertaratu den jende kopurua handiaz gain, hurbildu direnen parte-hartze maila handia izan da, ekarpen asko jaso ditugu araudian txertatzeko”.
Udal arduradunek irizpide orokor batzuk plazaratu zituzten barrutikako batzarretan. Garcia: “Bertakoen aparkatzeko beharrak lehenestea da araudiaren irizpide nagusia, eta horren arabera proposamen espezifikoak egin dira barruti bakoitzerako”. Araudi orokorreko zirriborroan lau aparkaleku-mota ezarri dira: bertakoentzako eremuak, mistoak, salbuespenezkoa oinezkoentzako guneetan, eta denbora mugatuko aparkalekuak. Horiek barruti bakoitzeko zein zonaldetan ezarri izan zuten hizpide lau bilera horietan, eta ideiak berriak ere jaso zituzten tokian tokiko alkateordeek.
Bileretatik ateratako, eta zabalik den proposamen aroko ekarpen guztiak jasota, horiek ahal den neurrian zirriborrotik proposamen egituratura pasako den agirian jasotzea du helburu gobernu taldeak. Irailerako nahi luke prest behin betiko aparkaleku araudia izango litzatekeena, eta adostasun zabala izango balu, hil horretan bertan ezartzea du asmo.
Aparkalekuen araudi berriaren prozesuaren gaineko informazio gehiago nahi izanez gero, baliatu esteka hau hara iristeko.
