Hortzak erakutsi ditu Hibaikak etxean
Estropada bikaina egin du etxean Hibaikako Gizonen ontziak. Ikurrina ez dute eraman, baina hirugarren postua egin dute errenteriarrek, irabazle izan den Astilleroren lau segundo eskasera.
Hibaikako gizonak gogor aritu ziren atzo. Argazkia: Dani Novas Etxean jokatu zuen Hibaikako Gizonen Madalen ontziak KAE2 Ligako bosgarren estropada atzo. Erakustaldia egin zuen David Iglesiasek entrenatzen duen taldeak latz borrokatu zuen hirugarren postua lortzeko, KAE2 Ligako sailkapen taulan liderra den Astillerotik lau segundo eskasera sailkatuta. Goi postuetan ari diren ontziekin parez pare aritzeko ahalmen betea erakutsi zuten atzoko erlojupekoan errenteriarrek. Bosgarren estropada honetan izan dute denboraldia hasi denetik emaitzarik onena.
Irabazlea, bosgarrenean ere Astillero, eta bigarren, Donostiarra. Hiru lehen ontzien artean, baina, lau segundo eskaseko tartea izan zen, eta horrek beste agertoki batean jartzen ditu Iglesiasenak. Donostian jokatutako KAE2 Ligaren laugarrenean, kolpea jo zuen jada Hibaikako gizonen tripulazioak eta bosgarren sailkatu bazen ere, tarte handia zabaldu zuen atzeko postuetan sailkatutako bi ontziekin. Atzoko estropadan, berriz, hirugarren sailkatuta Castreña eta Busturialdearen denborak hobetzeaz gainera, sailkapen taulan lehenengo biak diren ontzietatik oso-oso gertu jarri da. Laugarren sailkatu zen Busturialdeari 30 segundoko aldea atera zioten Madalen ontzikoek, eta 38 segundokoa Castreñari. Lutxana minutu eta hogei segundora sailkatu zen eta Santoña, berriz minutu eta hogeita hamalau segundora.
Iglesiasek eta gidatzen duen eskifaiak play offa dute jomugan, horretan jarraitzen dute, azken bi jardunaldietan urratsak egiten ari dira gorako bidean, goi postuetara ahalik eta gehien gerturatzeko. Azken bi jardunaldietako bideari eutsi beharko diote errenteriarrek.
Momentuz, Errenteria-Oreretako estropada jokatu ondoren bosgarren jarraitzen dute Hibaikakoek sailkapen orokorrean, baina aurretik den Busturialdearekin aldea laburtuta —lau puntu gehiago ditu Busturialdeak—. Hurrengo hitzordua Santoñan (Kantabria) dute. Hilaren 21ean, madalenak hasiko diren egunean, izango dute Hibaikako gizonek 12:00etan estropada. Atzoko emaitzak hemen klik eginda kontsultatu daitezke.
Ondoko argazkiak Dani Novas argazkilariak eginak dira.
