Seigarren postuari eutsi diote Hibaikako emakumeek
Bilbon eta Sestaon izan dituzte estropadak larunbat eta igandean Hibaikako emakumeek, eta euren txandako bigarren sailkatu dira bi egunetan. Sailkapen orokorrean seigarren dira 'Madalen' ontzikoak.
Hibaikako emakumeak aurreko estropada batean, Zierbenan. Argazkia: Iñaki Retegi Asteburuan bi estropada izan dituzte jokoan Hibaikako emakumeek, Bilbon eta Sestaon, hurrenez hurren. Bietan bigarren sailkatu dira euren txandan, eta seigarren postua egin bukaeran. Sailkapen orokorrean ere, seigarren dira errenteriarrak, asteburuaren ostean, koska bat gora eginda; hori da marra gorria zuzeneko jaitsiera eta play offa saihestea Euskotren Ligan mantenduta, eta ongi ari dira eusten erronka horri.
Larunbateko estropadaren ostean June Galardi arraunlariak egindako adierazpenetan “gustura” aritu zirela Bilbon esan zuen, “arraunkerarekin asmatu dugu, baita gure erritmoari eusten ere eta gustura gaude egindako lanarekin”.
“Kaxkagorra” dela errenteriarren eskifaia ere esan zuen oiartzuarrak, “eta estropadan zehar agerian utzi dugu ere”. helburua “hobetzea” dutela erantsi zuen Hibaikako arraunlariak. Marra gorria, esan bezala seigarren postu hori dute, hor mantentzen badira ziurtatuko dute Euskotren Ligan jarraitzea, baina hortik gora egitea ere badute helburu Iñaki Mendizabalek entrenatzen dituen emakumeak.
Hurrengo asteburuan ere jardunaldi bikoitza Euskotren Ligako emakumeek, Galizian biak. Ribeiran ariko dira larunbatean 17:25ean, eta Boiron igandean, 11:25ean.
