Sutean kaltetutako hiru familiei urgentziazko ostatua eman die aldundiak
Gaur arte mantenduko dute printzipioz ostatua, egunean zehar baloratuko baitute elkarlanean aldundiko eta Errenteriako Udaleko gizarte zerbitzuek egoera eta egin beharreko urratsak erabaki.
Sutea Alfontso XI kalean. Argazkia: Mendi Urruzuno Sutean kaltetutako hiru familiei urgentziazko ostatua eman die Gipuzkoako Foru Aldundiaren SFUS Gizarte Larrialdietarako Zerbitzuak. Komunikabideetara bidalitako ohar bidez jakinarazi du aldundiak, larunbatean izandako sutean kaltetutako familientzako laguntza hark kudeatu duela. Errenteriako Udalarekin koordinatuta egin du eta urgantziazko ostatua eskaini die hiru fam,miliari larunbat iluntzetik; tartean, lau adin txikiko dira. Gaur arte mantenduko dute printzipioz ostatua, egunean zehar baloratuko baitute elkarlanean aldundiko eta Errenteriako Udaleko gizarte zerbitzuek egoera eta egin beharreko urratsak erabaki.
Aldundiak, eskerrak eman dizkie larrialdi zerbitzu eta boluntario guztiei, “beren dedikazio eta profesionaltasunarengatik”, eta suteak kaltetutako familiei eta pertsonei laguntza ematen jarraitzeko konpromisoa erakutsi du.
Ilunabarrean kontrolatu zuten larunbatean Alfontso XI kaleko 13 zenbakiko azken etxebizitzan piztu zen sua, “larrialdi zerbitzuen eta boluntarioen esku hartze azkar eta eraginkorrari esker”. Hala ere, eraikinaren zurezko egiturak hozteko lanak gauera arte iraun zuen. Suteak egurrezko egitura bati eragin zion eta hiru parketako suhiltzaileak mobilizatu zituen: Oria, Irun eta Donostia. Suhiltzaile boluntarioen laguntza izan zen ere, eta “horien dedikazioa” funtsezkoa izan zela egoera kudeatzeko gaineratu du aldundiak.
Erreskate operazioan sei pertsona eraman zituzten kaltetutako eremutik eta horietako batzuk mediku arta behar izan zuten lekuan bertan.
