Javier Imaz Villaciain omenduko du Batzokiko Kirol taldeak
Madalenetako Haur Krosaren XV. ekitaldia egingo dute hilaren 24an, 12:00etan Koldo Mitxelena plazatik abiatuta.
![](https://oarsoaldea.hitza.eus/site/files/2015/07/krosa.jpg)
Batzokiko Kirol taldeak antolatuta, hamabosgarrenez, madalenetako Haur Krosa egingo dute hilaren 23an. Koldo Mitxelena plazan hasi eta bukatuko da lasterketa hori eta 12:00etan abiatuta.
Herriko txikienei begirako kirol proba “arrakastatsua” bilakatu dela esan dute antolatzaileek, “harro gaude jasotzen duen erantzunarengatik. Errenteriako Atletismo Taldearekin CAR jarri genuen martxa haur krosa, eta madalenetako ohiko ekitaldi bilakatu da urte hauetan”.
Helburua, txikienen artean kirola sustatzea dela esan du Batzokiko Kirol Taldeak, “aldi berean, balio indibidual zein kolektiboak landu eta indartzeko ezinbesteko tresna dela kirola uste dugu”. antolaketan jarraitzeko asmoa berretsi dute, gainera, XV. ekitaldiaren atarian.
Urtero bezala, gainera, kirol talde horrek herriko kirolaren alde egindako lanarengatik pertsona bat omenduko dute, “urtero omentzen dugu pertsona edo elkarte bat”. Aurtengo omendua, CAR taldekoJavier Imaz Villacian zena izango dute gogoan. Maiatzaren 26an zendu zen errenteriarra eta Errenteria Atletismo Taldeko kidea eta hark egindako lana aitortuko dute hilaren 23ko omenaldiarekin: “Madalenetako Haur Krosa abian jartzeko bere lankidetza aktiboagatik, eta gure herrian kirola, bereziki atletismoa, sustatzeko eta indartzeko egindako lanagatik omenduko dugu”.
Haurren begirako kirol probaren antolatzaileek Errenteria-Oreretako haur guztiak animatu dituzte krosean parte hartzera. Halaber, CAReko bazkide eta jarraitzaileak Javier Imaz Villacianen omenaldian parte hartzera gonbidatu dituzte”.
Madelenak pozez eta alaitasunez gozatzeko desioa ere luzatu diete herritar guztiei Batzokiko Kirol Taldekoek, “bereziki herritarren segurtasunari eta indarkeria matxistaren kontrako protokoloari adi ibiltzeko deia zabaltzen dugu, pozez eta alaitasunez ospa ditzagun jaiak”.