40.000 euro 75 errepide konponketa egiteko
Hilaren 22tik 24ra egingo dituzte herriguneko eta industrialdeetako errepideak hobetzeko lan horiek.
![](https://oarsoaldea.hitza.eus/site/files/2024/07/tomas-garbizu.png)
Lezoko Udalak herriko errepideetan konponketa lanak egingo ditu. Zehazki, 75 aktuazio egitekoa da hilaren 22 eta 24 artean egingo duen kanpainan. Horiek burutzeko 40.000 euroko aurrekontua bideratuko du. Herrigunetik hasiko dituzte lanak, eta ondoren industrialdeetara zabalduko dira.
Atontze lanak egiteko ez da errepiderik moztuko, baina trafikoan eragina izango dute unean uneko mozketekin. Hala, hilaren 19tik aurrera (ostiraletik) Udaltzaingoak konponketak egin behar diren eremuetan hesiak jarriko ditu, eta horrek aparkalekuen murrizketa ekarriko duela jakinarazi du udalak.
Honakoak dira lanengatik eragozpenak izango dituzten herriguneko kaleak:
- Tomas Garbizu.
- Donibane.
- Guillermo Lazon / Hipolito Gezala.
- Auñamendi.
- Zubitxo.
- Lexo Bertsolaria.