Saguzarrak bertatik bertara, Listorretan
Gipuzkoako Parketxe Sareak Errenteriako Udalarekin elkarlanean hainbat jarduera antolatu ditu aurten ere Listorretako aisia gunea ezagutzera emateko.
Saguzarren gainekoak ezagutuko dituzte irteeran parte hartzen dutenek. Urtero bezala, Aiako Harria natura parkean dagoen Listorreta aisia gunea ezagutzera emateko hainbat jarduera berezi antolatu ditu Gipuzkoako Parketxe Sareak Errenteriako Udalarekin elkarlanean. Lehen saioa bihar, ostirala, egingo dute, eta saguzarren gainean ariko da Lander Olasagasti aditua.
Espezie horren gaineko oinarrizko azalpenak jasota, parte hartzaileek detektagailu berezi batzuen bidez saguzarrak entzuteko eta ingurunea adi behatuz haietako bateren bat ikusteko aukera ere izango dute. Ugaztun hegalari ezezagun horiek ingurumenari egiten dioten ekarpenaz mintzatuko da Olasagasti. Jarduera euskaraz eta gaztelaniaz izango da. Bihar iluntzean izango da hori.
Hilaren 28an berriz, igandearekin, Gipuzkoako Foru Aldundiaren Basabizi zentroan sendatutako hainbat hegazti askatuko dituzte. Saioan basozainek libratuko diren hegaztiei, Basabizi zentroan egiten den lanai, eta zauritutako animalia bat aurkitzean egin beharrekoari buruzko azalpenak emango dituzte. saioa euskaraz eta agztelaniaz izango da.
Abuztuaren 15ean eta 24an berriz, Aiako Harria natura parkea ezagutzera emateko bi jarduera egingo dituzte. Listorretatik hasita ibilbide erraz eta motza antolatu dute parkeko altxorretako batzuk gertutik ezagutzeko aukera emateko.
Jardueretan parte hartzeko 943 49 42 48/688 89 50 68 telefono zenbakietara deitu edota posta elektronikora mezua bidali behar da aurrez. Klik hemen.
