San Pedroren berpizkunde igandea
Sasoiko emaitzarik onena lortu zuen atzo San Pedrok Boiroko estropadan, zortzigarren izan ziren moreak.
'Libia' ontzia atzo Boiron. Argazkia: Bermeo Arraun Argazkiak. Jaitsierako play-offak ekiditeko borrokan asteburu ona San Pedrorentzat. Igandea bereziki. Izan ere, atzoko Eusko Labeleko Boiroko estropadan sasoiko posturik onena bere egin zuen Libia traineruak, zortzigarren sailkatuz, eta sailkapen nagusian aurretik duen Kaiku lau postu (beraz lau puntu) atzerago utziz. Larunbatean 11. izan ziren berriz ere moreak Arousan.
Ehunenekoen garrantzia. Atzoko estropada sanpedrotarren berpizkundearen hasierako bezala eman badaiteke ere, sailkapeneko zeruratzea hobea izateko aukera izan zuten. Sanpedrotarrak zortzigarren izan ziren (20.45.48ko denborarekin), baina justu aurretik sailkatu zen Cabotik soilik lau ehunenekora sailkatu ziren. Estropada ia osoko erreferentziek Caboren alderatuz Libia-aren alde egiten zuten, baina azken luzean Galiziakoek lortu zuten pasaitarren aurretik jarri, eta beraz, oso-oso ona izan zitekeen igandea oso on bihurtzea soilik. Tira, hala ere, ontzat eman behar da atzoko emaitza, eta itxaropenerako aukerak daudela sinistu behar dute Kalparrakoek. Urdaibaik irabazi zuen atzokoa.
Ehunenekoen garrantziarekin jarraituz, larunbatean ere postu bat aurrerago izateko aukera izan zuen moreek, 10. izan zen Hondarribitik 6 ehunenekora sailkatu zirelako. Zierbenak irabazi zuen Arousakoa.
Asteburuan hainbat puntu jan dizkio Kaikuri San Pedrok. Orian, sestaotarretatik zortzira daude moreak sailkapen nagusian. Eusko Labeleko hamar estropada daude aurretik. Matematikek ematen dute. Moreen gogoak eta anbizioak ere bai.
Eusko Label Ligaren xehetasunak ikusteko, baliatu esteka hau.
