Lurrikara laranja prestatzen ari dira
Goiz eta eguerdi lasaia izaten ari da gaurkoa. Xanti eta Maialen eta buruhandien kalejira eta Beti Presten dantzaldia izan dira protagonistak eguerdira arte. Arratsaldean, kuadrillen poteoak nahasiko ditu bazterrak.
Xanti eta Maialen herriko plazan. Lasai joan da gaurko goiza, baita eguerdia ere. Xanti eta Maialen eta buruhandien konpartsak izan dira protagonista haur eta familien artean, eta korrika saioa bikainak egin dituzte gaztetxoek, beroa gorabehera, maskuri kolpeak saihesteko. Mundu bat ibili da kalez kale erraldoi eta buruhandien atzetik dantzan, haur, guraso, aiton-amonak…
Eguneko beste protagonista, Beti Prest dantza taldearen saioa izan da. OaingozHau mugimenduak antolatuta, Panier gunea euskal musikaz eta dantzaz bete dute. Gogotik aritu dira dantzazaleak, erdizka, jira eta bira.
Gainontzekoan lasai kaleak, kaleko postuetan jende gutxi, baita karruseletako eremuan ere, eta beroa.
Bestelakoa izango da arratsaldea. Aurten ez dute Kuadrilla Eguneko bazkaririk antolatu eta taldeka egin dute bazkarirako plana euren kontura. Zumardiko terrazetan, olatuaren parte izango diren laranja koloreko kamisetadun ugari: lagun kuadrillak, familiak… arratsaldeko lurrikara prestatzen ari dira. Izan ere, 17:00etan abiatuko da Lino Gunetik kuadrillen poteoa DJ Bull gonbidatu ezagunak gidatuta. Jendetsua izango da, oso jendetsua, eta puntu gorenak bi eremutan izango ditu, Madalena kalean lehenengo, eta Herriko Plazan ondoren. Azken horretan herri argazkia egingo du laranja koloreko lurrikarak, Xanti eta Maialenekin 19:30ean.
HITZAk iruditan jasoko du poteo erraldoia irakurleen eskura jartzeko.
