Herriaren izena handi egin zutenak
Gaur hasiko dira Donibaneko Santio Festak. Emakumeen lehen Kontxa, eta oraingoz gizonen azkena dena irabazi zutenak omenduko dituzte.
Goiko irudian 2014an Kontxa irabazi zuten emakumeak, behekoan 1999an KOntxa bere egin zuten gizonak. Arrauna sanjuandarren ondare da. Kirol ikuspegitik herriaren izena munduko mapan jarri eta handi egin zutenak —eta egiten dutenak— traineru arrosak, eta bertako arraunlariak dira. Haiek arduratuko dira gaur santioen hasierako txupina botatzeaz, 20:00etan. Gaur hasiko dira Santio Festak, eta hilaren 31ra arte luzatuko dira Pasaiako udako azken festak.
Izan ere, 1999an Kontxako Bandera irabazi zuten gizonek, eta 2014an Kontxa irabazi uzten emakumeek botako dute asteazkenean festak hasteko suziria. Duela 25 urteko hura Donibanera etorri den gizonen azken Kontxa izan zen; emakumeena duela hamar urteko hura, Bateleren lehena. 1999ko eta 2014ko iraileko bigarren igande haietan festa handia izan zen herrian. Erreka eta Batelerak traineruak jainko-jainkosen pareko izan ziren, arraunean bederen. Festa hura berpiztuko dute gaur herritar denen aurrean.
1999ko Kontxako bigarren igandean Erreka-n arraunean ibili zirenak honakoak izan ziren: Patxi Leon, Aitzol Aranzabe, Igor Makazaga, Miguel Angel Novoa, Antxon Sistiaga, Arkaitz Arregi, Karlos Mendizabal, Mikel Etxeberria, Anartz Gereño, Oskar Novoa, Eusko Aranburu, Ander Otero, Josu Bengoetxea eta Joseba Arbona (lemazaina). 2014ko iraileko igande hartan, Bateleren Kontxako bost banderetatik lehenean, honakoak eskifaiako kide: Josune Ugarte, Agurtzane Manterola, Maialen Arrazola, Arantzazu Otaño, Guruzne Azpiroz, Ane Hernandez, Sarai Lizaso, Oihana Cereijo, Irati Iñarra, Laura Goldarazena, Ainhoa Saizar, Garazi Martin, Ane Pescador eta Inder Paredes (lemazaina). Bi traineruen plantillako kideak gehiago ziren, beraz, haiei ere ohore, eta goza ditzatela festak!
Txupinazoaren ondoren (eta aurretik) beste hainbat ekitaldi daude gaur Donibaneko festen lehen egunean. Ondoko zerrendan ikus daitezke gaurko ekitaldiak nahiz biharkoak.
GAUR (ASTEAZKENA)
- 18:00. Burrunba elektrotxaranga Patxikutik plazarantz, karropoteoan.
- 19:00. Buruhandiak eta 11 Kolore konpartsa Meipitik plazara. Han erraldoiekin bat egingo dute. Bio eta Zabor ere bertan izanen dira.
- 20:00. Aurreskua, txupinazoa eta ikurrinaren igoera udaletxe zaharrean. Duela 10 urte Kontxako Bandera lortu zuten Batelerak, eta duela 25 urte Kontxako Bandera lortu zuten gizonen esku geldituko du txupinaren jaurtiketa, haiek omenduko dituzte.
- 21:30. Gazte afaria plazan, eta gazte txupinazoa.
- Ondoren. DJ Marikalanbre plazan.
- 23:30. DJ Gorka txosnetan.
BIHAR (OSTEGUNA). SANTIAGO EGUNA
- 07:00. Diana Kalean txarangarekin txosnetatik plazako sokamuturrera.
- 07:30. Diana Meipitik plazara.
- 08:00. Sokamuturra.
- 10:30. Gaztelutxoko igoera. Kaskoa derrigorrezkoa da.
- 12:30. Kantu jira, arrantzalez jantzita
- 16:30. Haurrentzako jolasak eta txokolatada Santiago plazan.
- 17:30. Mus txapelketa Bonantzan.
- 18:30. Donibaneko XXXIV. Dantza Solte Txapelketa Santiago plazan.
- 20:00. Herri kirolak Santiago plazan.
