Kukaña, bikaina!

Irribarreak, zartakoak eta umorea. OiangozHau herri mugimenduaren kukaña berriz ere jendetsua eta ikusgarria izan da.

2024/07/25

OiangozHau herri mugimenduaren xedea herri festa euskaldunak sustatzea da. Bide horretan, eskaintza zabala prestatzen du urtero madalenetan. Baina eskaintza horren barruan, beste ekitaldi eta jarduerekiko errespetu osoarekin, kukañarena da beharbada ikusgarriena. Enbor ikurrinadun koipeztatuaren ekintzara hurbiltzen direnak mordoa dira, asko. Gehienen buruan, ahalik eta zartako eta erorketa ikusgarrienen lekuko izatea da. Atzokoan Oiartzun ibaiaren bi ertzak lepo bete ziren kukañaren ekitaldirako, eta OiangozHauk jarduera horrekin duen beste xedeetako bat konplitu zen: Oiartzun ibaia herritarrei hurbiltzea. Batzuk barandatik, eta besteak ibaiaren ur berriztatuak besarkatzen, bete-betean asmatu zuten zereginarekin.

Hogei izan ziren atzoko kukañan parte hartu zutenak, bi emakumeak. Denek ausardia eta beldur eszeniko eza erakutsi zuten. Borja Arbelaitz esatari mundialaren gidaritzapean, irribarreak besterik ez ziren ikusi ibaiaren alboan. Irribarreak, eta zartakoak. Noski, ikurrina bere egin eta sari nagusiak irabazi zituztenak ere izan ziren. Honakoak: ikurrina hartu eta epaileek ezarritako lekura denbora gutxien erabili zuena, beraz kukañaren irabazlea (gizonen kategorian), Auritz Etxebeste izan zen; emakumeetan ez zuten sari nagusi hori banatu, ez zutelako lortu ikurrinara iritsi eta hartzea. Bestalde, erorketa onenen sariak ere bazeuden, Errenkoaldek (emakumeena) eta OARSO BIDASOKO HITZAk (gizonena) emandakoak: Lucia Escribano eta Sergio Guemes hurrenez hurren izan ziren horien irabazleak, epaileem deliberazio aro sakon eta emankor baten ondotik.

Gaur da madalenen azken eguna. Atzoko kukañaren bideo eta argazki sortaren ondoren dagoen koadroan ikus daiteke azken orduetarako madalenek duten eskaintza.

Errenteria Oreretako Madalenak 2024. Kukaña (2024-07-24)

Errenteria-Oreretako madalenak. Uztailaren 25eko egitaraua.

12:00 ERRALDOI ETA BURUHANDIEI HARRERA. Erriola gunea (Koldo Mitxelena plaza). Antolatzailea: Erriola gunea.
12:00 Ipuin kontalari: MAIDER GALARTZA. Panier-gunea. Antolatzailea: Oaingozhau kolektiboa.
12:00 ERRALDOIEN TOPAKETA. ERRALDOI ETA BURUHANDIEN KONPARTSEN IRTEERA. Parte-hartzaileak: Xanti eta Maialen eta konpartsa, Gaztañoko Triki taldea, udal txistulari taldea eta hurrengo konpartsak: Erriola, Tafalla, Beasain, Lezo, Pasaia eta Irurtzun. Ibilbidea: Koldo Mitxelena plaza, Mª de Lezo, Biteri, Alfontso XI, Donostia kalea, Irun kalea, Biteri, Koldo Mitxelena plaza. Antolatzailea: Erein Elkartea.
12:30 TRIKITILARIAK ETA BERTSO SAIOA. Bertsolariak: Irantzu Idoate Funosas eta Eki Manteorena Zozaia. Foru plaza. Antolatzailea: Xenpelar Bertso Eskola.
14:00 BAZKARI FEMINISTA. Panier-gunea. Antolatzailea: Oaingozhau kolektiboa.
14:00 HERRI BAZKARIA Erraldoi eta buruhandiekin. Erriola Gunea (Koldo Mitxelena plaza). Antolatzailea: Erriola gunea eta Erein Elkartea.
15:30 BLAITU FESTA DJ Arimaren eskutik. Erriola gunea (Koldo Mitxelena plaza). Antolatzailea: Erriola gunea.
16:30-21:00 Madalenetako GT-LMP txapelketa. Reina aretoa. Antolatzailea: Hobby Cars Elkartea.
17:00 DANTZA JAIALDIA. Zumardia. Antolatzailea: Eureka Gazte taldea. Laguntzailea: Oliber Nestar Dantza eskola.
17:30 ERRALDOI ETA BURUHANDIEN KONPARTSEN IRTEERA. Ibilbidea: Koldo Mitxelena, Maria de Lezo, Madalena, Foru plaza, Biteri txiki, Herriko plaza. Antolatzailea: Erein Elkartea.
17:45 Kale antzerkia: “ADABAKI” Bapatean zirko. Koldo Mitxelena plaza (Euria egingo balu, Koldo Mitxelena patioa).
19:00 MUNDUKO ARROZAK. Panier-gunea. Antolatzailea: Oaingozhau kolektiboa.
19:00 Kontzertua: KALAKAN. Xabier Olaskoaga plaza.
19:00 XANTI ETA MAIALEN ERRALDOIEN AGURRA. Ondoren, UREZKO ZEZENA ENTZIERRO TXIKIA. Herriko Plaza.
19:00 Erretako txahalen XIX. DASTAKETA ERRALDOIA. Iztieta. Diputazio plaza. Antolatzailea: Euskaldarrak Elkartea.
21:00 Kontzertua: ILARGI. Panier-gunea. Antolatzailea: Oaingozhau kolektiboa.
22:30 Kontzertua: BANTZALDIA. ERRENTERIAKO MUSIKA KULTUR ELKARTEAREN BANDAREN EMANALDIA. Zumardia. Antolatzailea: Errenteriako Musika Kultur Elkartea.
00:00 ZEZENSUZKOA. Ondoren, Errenteriako Musika Kultur Elkartearen Bandak “El CENTENARIO” ohiko pasodoblea joko du, eta jaiak amaituko dira.

Erlazionatutako edukiaEz dago aspertzerik madalenetan Herri bat egin dute

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.