Bogan hasi dira Santio Festak
Atzo hasi ziren Donibaneko santioak. 1999an eta 2014an Kontxa irabazi zutenek izan zuten festak hasteko ardura eta ohorea.
Atzo arratsaldean hasi ziren 2024ko Donibaneko Santio Festak. Bogan gainera. Izan ere, jai aroaren hasierako unea arraunlariena izan zen, beteranoena: 1999an Erreka traineruarekin Kontxa irabazi zuetn gizonek, eta 2014an Batelerak ontziarekin Kontxa irabazi zutenek izan zuten jaiak hasteko ardura, eta ohorea. Haien ordezkaritza bat izan zen goraino bete zen Santiago plazaren aurrean, udaletxe zaharretik jai zoriontsuak opa, eta herririk gabe haiek lortutako guztiak ezinezko izango zirela aitortzeko. 20:00etan bota zuten suziria; hilaren 31ra arteko jaiegunak dituzte Donibanen.
Festen hasierako ekitaldia baino lehen, Burrunba elektrotxarangakoak nahiz 11 Kolore konpartsakoak arduratu ziten sanjuandarrak girotu, eta haiek plazara erakartzeaz. Udaletxe zaharreko balkoian zituzten zain Aintzane Taberna Donibaneko alkateordea, Luisma Laboa hasierako ekitaldiaren aurkezlea, arraunlari beteranoak, eta ikurrina. Tabernak festa zoriontsuak izan ditzatela eskatu zien sanjuandarrei, eta jai batzordeak egindako lana aitortu zuen. Festak berdintasunean eta errespetuan igaro daitezela, hura ere alkateordearen desioa.
Hitz tarteen ostean, ikurrina altxa zuten. Bandera goian, aurreskuaren txanda izan zen. Jada jaiak ofizialki abian, gozamenerako astebeteari etekina ateratzen hasi ziren sanjuandarrak eta hala nahi izan zuten guztiak. Gaur Santiago eguna da, bihar Santa Ana, 27an San Pantaleon, 31n San Inazio… Santu asko festetan, baina atzokoan jainko-jainkosa eta eredu, herriko arraunlariak.
Jarraian, atzokoa hitzez azaltzea baino errazago egiten duten irudiak. Beherako, gaurko, biharko eta etziko festa egitarauak.
Donibaneo Santio Festak. Gaur, bihar eta etziko egitaraua.
GAUR (OSTEGUNA). SANTIO EGUNA.
- 10:30. Gaztelutxoko igoera. Kaskoa derrigorrezkoa da.
- 12:30. Kantu jira, arrantzalez jantzita
- 16:30. Haurrentzako jolasak eta txokolatada Santiago plazan.
- 17:30. Mus txapelketa Bonantzan.
- 18:30. Donibaneko XXXIV. Dantza Solte Txapelketa Santiago plazan.
- 20:00. Herri kirolak Santiago plazan.
BIHAR (OSTIRALA). SANTA ANA EGUNA.
- 09:30. Ezinduak beren etxeetan jaso eta Santa Ana ermitara eramango dituzte.
- 11:00. Haurren pala txapelketa frontoian.
- 11:00. Meza nagusia Santa Ana ermitan. Ondoren salda eta pintxo dastaketa txistulariekin.
- 13:00. Kuadrillen topaketa Santiago plazan.
- 14:30. Bazkari autogestionatua Santiago plazan. Ondoren, bingo musikatua. Bukatzean, karropoteoa alde zaharretik.
- 17:00. Goitibeherak.
- 20:00. Mirari Martiarenaren bakarrizketa txosnetan.
- 22:00. Erromeria Santiago plazan Gauargi taldearekin.
- 00:00. Kontzertua txosnetan.
ETZI (LARUNBATA). SAN PANTALEON EGUNA.
- 10:00. Kukaña Santiago plazan.
- 12:00. Jubilatuen eta arrantzaleen omenezko meza Bonantzan.
- 14:00. Jubuilatuen bazkaria Santiago plazan.
- 15:00. Herriko kuadrillek sardinak eta ikatza jasoko dute Arizabalon.
- 16:15. Pasai txaranga herrian barrena.
- 19:00. Sardina-jatea herri osoan.
- 20:00. DJ Javi herri osoan.
- 22:30. Arrantzaleen danborrada Konstantzia bandarekin.
- Ondoren. DJ Javi.
- 00:00. DJ Bull txosnetan.
