Emakume bat hil da Gaintxurizketan ibilgailu batek harrapatuta
Goizeko 10:15 inguruan gertatu da ezbeharra GI-636 errepidean, eta Ertzaintza gertatutakoa ikertzen ari da.
Gaintxurizketako artxiboko irudi bat. Eusko Jaurlaritzako Segurtasun Sailak jakinarazi du emakume bat hil dela gaur Lezon, Gaintxurizketatik pasatzen den Gi-636 errepidean izandako auto istripu batean. Goizeko 10:15ean bueltan gertatu da ezbeharra, eta harrapaketako ibilgailuaren gidariak ihes egin zuen. Egunaren bukaeran topatu dute ezbeharrean nahastutako kamioia, eta gidaria identifikatu.
Istripua Gaintxurizketako Euskotrenen geltokitik gertu izan da, errepidearen 7. kilometroan. Ertzaintza bertaratu denean emakumea suspertzen saiatu dira, baina zaurien larritasunagatik hil egin da. Urte honetan Gaintxurizketan istripuz hil den bigarren biktima da gaurkoa, eta Mikel Arruti Lezoko alkateak eskaria egina dio aldundiari “trafiko istripuak aztertzekoa, eta soluzioak bilatzekoa”.
Arrutik doluminak eman dizkie hildakoaren senideei eta hurbilekoei, eta argi azaldu du istripua ez dela “zorigaitzaren kontua soilik” izan. Soluzioak galdegin ditu beste behin alkateak, eta horretarako erakunde bakoitzak dagokion lana egin behar duela dagokion arduratik azaldu du. “Urgentziazkoa da”, bukatu du.
