Jai Batzordearen erabakiz, ez dira Gurutzeko festak ospatuko
Udalak azaldu du Frantziako Alpeetan hildako gazteetako bat Gurutze auzokoa zela, eta saminarekin bat eginez, ez direla festak ospatuko.
![](https://oarsoaldea.hitza.eus/site/files/2024/08/gurutze-1200x646.jpg)
Pasa den astean Frantziako Alpeetatik heldutako albisteen ondorioz atsekabea nagusitu da Oiartzunen; izan ere istripuan hildako gazteetako bat Gurutze auzokoa zen.
Aste honetan ziren hastekoak Gurutze auzoko festak, eta ildo horretatik Markelen familiarekin adostutako ohar bat argitaratu du udalak: “Asteburu honetan eta hurrengoan ziren ospatzekoak Gurutze auzoko festak. Herri osoaren eta, batez ere, auzotarren saminarekin bat eginez Jai Batzordeak festak bertan behera uztea erabaki du. Markel Galdos Cardeñoso antolaketa lanetan buru-belarri zebilen, auzoko gazte inplikatua zen”.
Bestalde, oharrean udalak azaldu du Galdos sendiak, gorpua ekartzeko tramiteak amaituta, Oiartzungo herritarren partetik jaso duten babesa eta goxotasuna eskertu nahi izan dituztela.
Azkenik, azaldu dute gorpua Oiartzungo beilatoki publikora asteazkenean (abuztuak 28) iristea aurreikusten dela, eta printzipioz ostegunean egingo diotela agurra hurbilekoek eta kide zen elkarteetako lagunek: “Herriak eta hurbilekoek egingo dioten agurra izanik, udalak eta familiak eskatzen dugu une hori goxoa izan dadin dagokion intimitatea errespetatzeko”. Horretaz gain, beilatokian sor daitezkeen trafiko gorabeherak ekiditeko oinez gerturatzeko deia egin dute.
Oharrean azpimarratu dute hauek izango direla familiaren eta udalaren aldetik egingo diren azken adierazpenak.