Leihotikan eta Lepora, ikasturtea hasteko Oarsomusikaren proposamena
Irailaren 28an izango da kontzertua, Niessen aretoan eta sarrerak salgai jarri ditu jada Oarsomusikak, 12 euroan.
Leihotikan taldea da arituko denetako bat iraileko kontzertuan. Gogorretik hasiko du ikasturtea Oarsomusikak. Irailaren 28rako jarri du zita eskualdeko musika arloa dinamizatzea helburu duen lantaldeak, eta ez da nolanahikoa izango hitzordua, izan ere Leihotikan talde iruindarra eta Lepora talde gasteiztarra ariko dira oholtza gainean.
Lepora laukoteak ohikoa duen estilo gordin eta zuzena ekarriko du Niessen aretora. Txus Billabeitia (gitarra), Gorka Lazkano (baxua), Ibon Salterain (bateria) eta Mikel Salcedo Txusta (ahotsa) dira taldekideak. 2020an atera zuten argitara lehen diskoa, Lepora eta 2023ko udaberrian, bigarrena, Zulotik. Aurretik eskarmentu handia dute taldekideek musika arloan; Billabeitia Same Old, Libe, Losado, EH! taldeetan aritu da; Salterain, Tutan Come Onen; Lazkano, Kashbad eta Trumbon taldeetan, eta Salcedo Iont taldean.
Leihotikan taldeak hartuko du lekukoa. Gorka Armendariz (ahotsa), Alfonso Contin Titi (bateria), Aitor Remon (baxua) eta Patxi Mercero (gitarra) taldekideek hardcore melodikoz eta letra landuekin beteko dute aretoa. Etorkizuna ginenean da nafarren azken diskoa; Gorka Urbizu (Berri Txarrak) hasiz en disko berriaren produkzio lanetan Leihotikan taldeari ohiko soinuetatik harago jarrera, eta energia emanez. Dinamismoa, punk melodia duten zortzi kanta dira lanaren emaitza, eta kaleko aldarrikapenak, norberaren arazoei aurre egiteko modua, edota adiskidetasunaren lanketaren gainean mintzatu dira, besteak beste, disko horretako kantetan.
Kontzerturako sarrerak salgai daude jada, online, eta 12 euroan eros daitezke. Horretarako egin klik hemen. Kontzertua 21:00etan hasiko da.
