Askotariko kultura digitalen topagune izango da Gaztaño
Irailaren 26tik 29ra egingo dute Hackmeetinga eta hura aurkezteko hitzaldia antolatu dute ostiralean, hilak 30, gaztetxean.
Gaztañoko hainbat espazioetan izango da topagunea. Hackmeetinga egingo dute Gaztañon irailaren 26a eta 29aren artean. Askotariko Kultura digitalen topagunea da Hackmeetinga, software askea, sare libreak, pribatutasuna eta oro har teknologia jabeek inposatzen dituzten teknologia kontsumoen erresistentzia foku bat, “mundu digitaletik fisikora doan tartea estutzeko erabilgarri eta kolektibo ezberdinen elkar ezagutza bultzatzen duena”.
Topagunearen atzean ez da antolatzailerik, soilik parte hartzaileak, “autogestionatua da”. Hiru egunetan zehar hitzaldi, joko, festa, eztabaida, iritzi trukea eta ikasketa kolektiborako aukera izango da Hackstañazo HM 2024 topagunean.
Topaketa Gaztañoko gune ezberdinetan izango da eta izena eman nahi dutenentzat web orri bat jarri dute eskura (egin klik hemen). Bertan izango dute gainera interesdunek landuko den gaitegia, baita gaiak proposatzeko aukera ere.
Topagunearen berri zehatzago emateko, bestalde, aurkezpena eta hitzaldia antolatu dituzte ostiralean, hilaren 30ean, Oreretako Gaztetxean, Smartphone eta militantzia goiburuarekin, 18:30ean.
