'Txori urdinak' liburua aurkeztuko dute Gaztañoko auzo lokalean
Bizitza erdia espetxean eman duen Santi Cobos liburuaren protagonistak, eta hura idatzi duen Zigor Olabarria Argiako kazetariak egingo dute aurkezpena irailaren 6an.
Santi Cobos liburuaren gaztelaniazko bertsioa esku artean. Argazkia: Itxaso Ruiz Mardaras (El Salto) Gaztañoko auzo lokalak irailean hasiko du udako etenaldiaren ostean hitzaldi zikloa. Orain arte bezala, ikasturte honetarako ere proposamen interesgarriak egingo ditu, eta lehenengoaren berri eman du jada. Irailaren 6an, ostiralarekin antolatu du lehen hitzaldi hori, 19:00etan. Txori urdinak liburuaren aurkezpena egingo dute bizitza erdia espetxean eman duen Santi Cobos liburuaren protagonistak, eta hura idatzi duen Zigor Olabarria Argiako kazetariak.
2021eko azaroan argitaratu zuen liburua Argiarekin. Bi urte geroago, 2023a, gaztelaniazko bertsioa argitaratu zuten Pajaros azules. Un retrato del sistema carcelario por Santi Cobos Uxue argitaletxearekin.
Erreformatorioa, adin txikikoentzako espetxea, zein espetxea ezagutu ditu. Espetxealdian zuzen-zuzenean pairatu dituen FIES sailkapena, tortura, jipoiak eta isolamenduaren kontaketa egin du liburuan; baita egindako protesta eta ihesaldi saiakerez mintzatu ere. Espetxe sistemaren gaineko kontaketa da liburua, haren salaketa, espetxearen erretratu bat Cobosen ahotik, eta irailaren 6an lehen eskutik entzuteko aukera izango dute Gaztañoko auzo lokalera bertaratzen direnek.
Gaur-gaurkoz baldintzapeko askatasunean da Cobos, eta 2029. urtera arte ez da aske geldituko.
Ikastaroak ere prest
Hitzaldi zikloari ekiteko prest den bezala, ikastaroekin hasteko moduan da Gaztañoko auzo lokala. Orain arte eskainitako ikastaroei bi berri gehitu dizkiote ikasturte berrirako: Yoga eta Zure erritmoarekin dantzan tailerrak zehazki.
Ikastaro horien guztien gaineko informazioa zabaltzeko ate irekien jardunaldia antolatu du datorren ostegunean, irailak 5, 18:00etan Gaztañoko auzo lokalean bertan. Ikastaroetako arduradunek tailer bakoitzaren gaineko informazioa emango dute, eta interesa duten auzotar zein gainontzeko herritarrak ere parte hartzera deitu ditu auzo elkarteak.
