Herritar etorri berriei euskarara hurbiltzeko kanpaina, martxan
Oarsoaldeko Euskara Batzordeak koordinatu du iniziatiba, eta bere helburua da Oarsoaldera bizitzera etorritako herritar berriak euskarara gerturatzea.
![](https://oarsoaldea.hitza.eus/site/files/2024/08/gertu-eus-ezagutu-istorioak-2.png)
Beste herrialde batzuetatik Oarsoaldera bizitzera etorritako herritar berriak euskarara gerturatzeko eta ongi etorriak sentitzeko, sentiberatzeko kanpaina bat abiatu dute eskualdeko lau udalek. Oarsoaldeko Euskara Batzordeak koordinatu du kanpaina, eta bere helburua da herritar etorri berriak euskararanzko urrats bat egitea: “Nork bere errealitatetik eta zirkunstantzietatik, euskararanzko urrats bat egin dezaten bilatzen dugu, herriaren bizitzan behar bezala murgiltzeko eta, horrela, bide berriak irekitzeko”.
Euskara Batzordeak adierazi du norberak erabakiko duela “nola eta noraino” hurbildu nahi duen euskarara; esaterako, hitz solteak eta agurrak ikasiz, seme-alabak euskal ereduan eskolatuz, bere saltokian euskararen presentzia bermatuz, elkarrizketa laburrak egiteko adina ikasiz edota kultur eskaintzetara joanez. “Bide zabal eta anitza eskaintzen die gure eskualdeak bertara etorritako pertsona horiei”, esan dute antolatzaileek.
Euskarara gerturatzeko kanpainak euskara “promozio sozialerako elementu gisa” aurkezten dela baietsi du Euskara Batzordeak. Hori dela eta, bakoitzak “unean uneko ahalmenetik” euskara kontuan har dezaten nahi dute sustatzaileek, “euskararen komunitateko kide izatera” gonbidatuz.
Oarsoaldea eskualde “anitza” dela gogorarazi dute antolatzaileek; horregatik, “elkartasun osoz” jardun nahi dute hona etortzen diren bizilagun berriekin, “elkarbizitza eta herritarren arteko ezagutza indartuz eta beti ere euskara bidelagun”.
Irailaren 1etik 30era herritar etorri berriek euskarara hurbiltzeko gonbita jasoko dute hainbat bidetatik: autobus geltokietako markesinak, sare sozialak, esku orriak, bideoa edota prentsa.
Sustatzaileek nabarmendu dute kanpainako euskarriek irudi “erakargarri eta koloretsua” dutela. Mezuak eta leloak, gainera, euskaraz, gaztelaniaz, frantsesez, ingelesez eta arabieraz idatzi dituztela zehaztu dute. Kanpainaren euskarri nagusiak etorri berri batzuen eta eskualdeko herritar batzuen lekukotzak azaltzen dituen bideo labur batzuk dira, eta sare sozialetan eta Oarsoarrak webgunean daude ikusgai.