Xenpelar Tailerrek astelehenean zabalduko dute izena emateko epea
Irailaren 2tik 13ra arte izango da izena emateko aukera, online zein modu presentzialean.
Maite Gartzia Kultura zinegotzia gaurko agerraldian. Astelehenean, irailak 2, zabalduko dute Xenpelar Tailerrek izena emateko epea eta irailaren 13ra arte izango da irekita. Matrikula egiteko bi modu izango dira: online (horretarako egin klik hemen) edo modu presentzialean, Zu! Zure Udala herritarren arreta zerbitzuetako bi bulegoetan— Herriko Plazan edo Aldakoenean—. Modu presentzialean egin nahi dutenek, hitzordua eskatu beharko dute aldez aurretik 943 44 96 00 edo 010 telefono zenbakietara deituta irailaren 5etik 13ra.
Ikastaroei dagokienean, helduentzako urte osoko edo lau hilabeteko ikastaroak izango dituzte aukeran, astean 2 edo 6 orduko iraupenarekin. Diziplinak, berriz, honakoak: pintura, zeramika, argazkigintza, egur taila, altzarien zaharberritzea, eta patchwork. Berritasunik ere bada, izan ere, lau hilabeteko ikastaroen barruan Van Goghen eran margotzen pintura ikastaroa eta Kameraren erabilera argazkigintza ikastaroa eskainiko dituzte.
Matrikulazio kanpainaren berri emateko agerraldia egin du gaur Maite Gartzia Kultura zinegotziak eta berak jakinarazi du tasak norberaren gaitasun ekonomikoaren arabera zehaztuko direla, “horretarako, matrikularekin batera eskaera eredu normalizatua aurkeztu beharko da, online zein presentzialki; ebazpena, ondoren egingo da.
Informazio guztia Xenpelar Tailerren web orrian kontsulta daiteke —klikatu hemen— edo 943 44 96 35 telefono zenbakira deituta.
